Semeytany.kz – Абай облысының әкімі Берік Уәли Бесқарағай ауданының жаңа әкімі болып сайланған Ділдар Қалиқанұлы Қалиқанды аудан активіне таныстырды.
«Қазақстан Республикасының Сайлау туралы» заңына сәйкес, 2026 жылғы 31 наурыздан бастап Ділдар Қалиқанұлы Қалиқан Бесқарағай ауданының әкімі болып ресми түрде сайланды. Ол 29 наурыз күні өткен тікелей сайлау қорытындысы бойынша басым дауыспен жеңіске жеткен.
Жиын барысында Бесқарағай аудандық аумақтық сайлау комиссиясының төрағасы Бауыржан Баталов жаңадан сайланған әкімге арнайы куәлігін табыстады.
Облыс әкімі Берік Уәли өз сөзінде Ділдар Қалиқанұлының мемлекеттік қызметте тәжірибесі мол, білікті басшы екенін атап өтті. Аймақ басшысы Бесқарағай ауданы ауыл шаруашылығы саласында да, орман шаруашылығы бағытында да әлеуеті жоғары өңір екенін айтты. Сонымен қатар, ауданның өзіндік ерекшеліктері мен шешімін күткен мәселелері де бар екенін жеткізіп, жаңа әкімнің әлеуметтік-экономикалық даму, инфрақұрылымды жақсарту және елді мекендердің көркеюі бағытында белсенді жұмыс істейтініне сенім білдірді.
Айта кетейік, былтырдан бастап қолданыстағы заңнамаға сәйкес облыстық маңызы бар қала мен аудан әкімдерін тұрғындар тікелей дауыс беру арқылы сайлау мүмкіндігіне ие болды. 2023 жылы пилоттық режимде Курчатов қаласы мен Абай ауданы әкімдерінің сайлауы өткен. Ал 2025 жылы өңірде Жаңасемей, Көкпекті аудандарының және Семей қаласы әкімдерінің сайлауы ұйымдастырылды. Семей қаласы әкімінің сайлауы ел тарихындағы облыс орталығы әкімін тікелей сайлаудың алғашқы үлгісі ретінде тіркелген.
Ділдар Қалиқанұлы Шығыс Қазақстан облысының Катонқарағай ауданында туған. Еңбек жолын бизнес құрылымдарында бастаған. Әр жылдары Шығыс Қазақстан облысы ішкі саясат басқармасында, облыс әкімі аппаратында, Зайсан және Катонқарағай аудандарында түрлі жауапты қызметтер атқарған. Сондай-ақ Катонқарағай ауданының әкімі, Абай облысы әкімінің кеңесшісі болған. 2025 жылғы 25 желтоқсаннан бері осы уақытқа дейін Бесқарағай ауданы әкімінің орынбасары қызметін атқарып келген.
