Semeytany.kz – Абай облысының әкімі Берік Уәли Аягөз ауданына жұмыс сапары барысында аудан орталығында өткен баспана кілттерін табыстау рәсіміне қатысты.
Аягөз қаласында бой көтерген 5 қабатты, 60 пәтерлі тұрғын үй «Отбасы банк» акционерлік қоғамы арқылы мемлекеттік қолдау бағдарламасы аясында салынған. Пәтерлер кезекте тұрған көпбалалы отбасыларға, жетім балаларға, І және ІІ топтағы мүгедектігі бар азаматтарға, сондай-ақ бюджеттік сала қызметкерлеріне бөлінді. Нәтижесінде 31 отбасы жаңа баспананың кілтіне ие болды.
Салтанатты шарада облыс әкімі тұрғындарды қоныс тойымен құттықтап, өңірде халықты баспанамен қамту жұмыстары жүйелі түрде жалғасып жатқанын атап өтті. Оның айтуынша, жаңа пәтер – әр отбасы үшін жаңа өмірдің бастауы және балалар болашағына жасалған маңызды қадам.
Шара аясында аймақ басшысы тұрғын үй ауласына ағаш көшеттерін отырғызу рәсіміне де қатысты. Ал жаңа пәтер иелері мемлекет қолдауына ризашылықтарын білдірді. Үш баланың анасы Қымбат Думанқызы 2022 жылдан бері кезекте тұрғанын айтып, баспаналы болғанына қуанышты екенін жеткізді.
Аягөз ауданында тұрғын үймен қатар инфрақұрылымды дамыту жұмыстары да қатар жүргізіліп келеді. Соңғы уақытта қаладағы «Орталық» қазандықта үш жаңа қазандық орнатылып, 3,9 шақырым жылу желісі жаңартылған. Сонымен қатар жол жөндеу жұмыстарына 2,1 млрд теңге бөлініп, бірқатар ауылдар мен қала көшелері жаңартылды.
Білім беру нысандары да назардан тыс қалған жоқ. Өткен жылы аудан бойынша бірнеше мектеп күрделі жөндеуден өтті. Биыл да бұл бағыттағы жұмыстар жалғасады.
Қазіргі таңда Аягөз ауданында ауыз су жүйелерін жаңғырту, жолдарды жөндеу және қоғамдық кеңістіктерді абаттандыру бағытында бірқатар жобалар іске асырылып жатыр. Атап айтқанда, Ақшәулі ауылында су құбыры тартылса, қаладағы Қабанбай батыр көшесіндегі аллея мен орталық алаң жаңартылуда.
Жалпы, ауданда қолға алынған жобалар халықтың тұрмыс сапасын арттыруға және өңірдің дамуына серпін беруге бағытталған.
