Semeitany.kz — Абай облысының әкімі Берік Уәлидің төрағалығымен кеңейтілген аппараттық кеңес өтті. Жиында жол қозғалысы қауіпсіздігін қамтамасыз ету, кәмелетке толмағандар мен жастар арасындағы құқық бұзушылықтардың, зорлық-зомбылық пен буллингтің алдын алу мәселелері талқыланды.
Кеңеске облыстық басқармалар мен өңірлік департаменттердің басшылары қатысты. Қала және аудан әкімдері бейнережим арқылы қосылды. Күн тәртібіндегі мәселелер бойынша облыстық жолаушылар көлігі және автомобиль жолдары басқармасының басшысы Мерей Байырхан, білім басқармасының басшысы Айжан Құрманова және облыстық полиция департаменті бастығының орынбасары Жасұлан Байкенов баяндама жасады.
Жиында жол қозғалысы қауіпсіздігін арттыру бағытында атқарылып жатқан жұмыстар мен алдағы міндеттер қаралды. Тоғыз айда республикалық маңызы бар жолдарда жануарлардың қатысуымен 268 жол-көлік оқиғасы тіркелген. Қауіпсіздікті күшейту мақсатында жолдарға малға қарсы қоршаулар орнатылып, жол белгілері мен таңбалары жаңартылуда.
Облыста жол инфрақұрылымын жөндеу жұмыстары да жалғасып жатыр. Республикалық жолдарда 33 мың шаршы метрден астам ойық жөнделіп, малға қарсы 13 шақырым қоршау орнатылған. Ал облыстық және аудандық жолдарда 160 мың шаршы метрден астам асфальт жамылғысы қалпына келтірілді.
Семей қаласында жалпы ұзындығы 22,7 шақырымды құрайтын 20 көшеде жөндеу жұмыстары жүргізіліп, жаяу жүргіншілер жолдары салынып, жол белгілері орнатылуда.
Облыс әкімі жол-көлік оқиғаларының салдарына ерекше назар аудару қажеттігін атап өтті.
«Жол-көлік оқиғаларының жалпы саны азайғанымен, қаза тапқандар санының өсуі алаңдаушылық туғызады. Әсіресе мектептердің маңындағы қауіпсіздікке, жолдардың қауіпті учаскелеріне, қараусыз жүрген малға және жаяу жүргіншілер инфрақұрылымына ерекше назар аударуымыз қажет. Жол қауіпсіздігі тек полицияның міндеті емес. Бұл – жергілікті атқарушы органдардың, жол қызметтерінің және барлық жауапты мекемелердің ортақ жауапкершілігі», – деді Берік Уәли.
Аймақ басшысы Абай, Ақсуат, Аягөз және Жарма аудандарының әкімдеріне, білім және балалардың құқықтарын қорғау басқармаларына, сондай-ақ полиция департаментіне 14 білім беру ұйымының маңындағы жол қауіпсіздігіне қатысты кемшіліктерді жою жөнінде нақты жоспар әзірлеуді тапсырды. Жұмыстар толық аяқталғанға дейін балалардың қауіпсіздігін қамтамасыз ететін уақытша шаралар қабылдау қажеттігін ескертті.
Сонымен қатар қараусыз жүрген малдың жолға шығуына жол бермеу, мал иелерінің жауапкершілігін арттыру және қауіпті учаскелердегі қауіпсіздік шараларын күшейту міндеттелді. Жауапты мекемелерге жөндеуді, жарықтандыруды, қоршау орнатуды және жол таңбаларын жаңартуды қажет ететін басым учаскелердің тізімін әзірлеу тапсырылды.
Кеңесте балалар мен жастардың қауіпсіздігі мәселесі де кеңінен қаралды. Өңірде кәмелетке толмағандар арасындағы құқық бұзушылық көрсеткіштері төмендегенімен, балаларға қатысты құқық бұзушылықтар саны артқан. Осыған байланысты жауапты басқармалар мен полиция департаментіне профилактикалық жұмыстарды күшейту, тәуекел тобындағы балаларға жеке қолдау көрсету және білім беру ұйымдарындағы қауіпсіздік жүйелерін тұрақты бақылау міндеті жүктелді.
Облыстық білім басқармасының мәліметінше, өңірдің білім беру ұйымдарында 99 657 оқушы мен 20 454 студент білім алады. Мектептерде 16 мыңнан астам бейнебақылау камерасы орнатылған. Сонымен қатар 304 мемлекеттік мектептің барлығы бейнебақылау жүйесімен қамтылған.
Оқушылардың қауіпсіздігі мен психологиялық саулығын қамтамасыз ету үшін педагог-психологтар мен әлеуметтік педагогтер жұмыс істеп, балаларға және олардың ата-аналарына жеке консультациялар береді. Жыл басынан бері білім беру ұйымдарында мемлекеттік органдармен бірлесіп 2 683 іс-шара өткізілген. Апта сайынғы қауіпсіздік сабақтарында буллингтің, құқық бұзушылықтардың және интернеттегі қауіптердің алдын алу мәселелері түсіндіріледі.
Жиында балалар арасындағы суицидтің алдын алу, отбасындағы зорлық-зомбылық пен буллингті ерте анықтау, қолайсыз отбасылардағы балаларға қолдау көрсету және жасөспірімдердің бос уақытын тиімді ұйымдастыру жұмыстарын күшейту қажеттігі айтылды.
«Балалардың қауіпсіздігі – біздің жұмысымыздың негізгі басымдықтарының бірі. Бұл бағытта формалды есепке емес, нақты нәтижеге жұмыс істеуіміз керек», – деді облыс әкімі.
Берік Уәли жауапты басқармалар мен полиция департаментіне балаларға қатысты құқық бұзушылықтардың көбею себептерін талдап, олардың алдын алу бойынша нақты іс-шаралар жоспарын әзірлеуді тапсырды.
Сондай-ақ профилактикалық есепте тұрған отбасылардың әлеуметтік жағдайына тұрақты мониторинг жүргізу, балаларды тегін үйірмелерге, спорт секцияларына және шығармашылық жобаларға тарту, білім беру ұйымдарындағы бейнебақылау мен дабыл жүйелерінің жұмысын тексеру міндеттелді.
