Достық үйінде коммуналдық қызметтер тарифінің көтерілуіне байланысты қала әкімі Ермак Сәлімовтің төрағалығымен қоғамдық тыңдау өткізілді. Жиынға ҚР ҰЭМ Табиғи монополияларды реттеу және бәсекелестікті қорғау комитетінің Шығыс Қазақстан облысы бойынша департаментінің басшысы Қайрат Оразбаев, «Теплокоммунэнерго» МКК әкімшілік құрамы және қала тұрғындары қатысты.
{jcomments on}Қоғамдық тыңдауды өткізуге Семей қаласындағы жылу ақысының көтерілуі арқау болыпты. Ағымдағы жылдың 30-шы сәуірінде «Теплокоммунэнерго» МКК жаңа ұзақ мерзімді тарифті (5 жылға) бекіту үшін облыстық табиғи монополияларды реттеу және бәсекелестікті қорғау комитетіне өтініш білдірген болатын. Мекеменің экономикалық жоспарлау бөлімі басшысының міндетін атқарушы Азат Рахымғалиев атап өткендей, бағаны қосуға көмір, электр қуаты және судың қымбаттауы әсер еткен. Сонымен қатар қызметкерлердің орташа еңбекақысын көтеру қажеттілігі туындауда. Бұдан бөлек қазіргі тариф өз құнын ақтамай отыр екен. Сол себепті алдағы бес жылда жылу энергиясы мен судың бағасын кезең – кезеңмен 53%-ға көтеру жоспарланып отыр. Ал аталмыш кәсіп- орын қала бойынша 17 жылу кешеніне қызмет көрсетеді. Олардың қатарына № 1 ЖЭО және он алты жылу қазандығы кіреді. Мекеменің қарамағына 72 жылу пункті мен 282 шақырымды құрайтын жылу желісі қарайды. Ұжымның бас экономисі баяндағандай, «Теплокоммунэнерго» берешекке белшеден батқандықтан тек осындай қадам арқылы ғана тығырықтан шыға алады. Бүгінгі күннің өзінде қарыз көлемі 1 млрд. теңгеден асып отыр.
– Қазіргі күнгі жылу ақысы мекеме шығынын ақтамайды. Сондықтан да тариф саясатын қайта қарастыруға тура келді. Өздеріңізге мәлім болғандай, қажетті отын да қымбаттау үстінде. Сонымен қатар 2016-2020 жылдарға жоспарланған инвестициялық жобаларды іске асыруымыз қажет. Оның аясында қазандық агрегаттары мен жылу желілерін ауыстыруды көздеп отырмыз. Жылу құны 53 пайызға бірден көтерілмейді. Ол — сатылап жүзеге асырылатын процесс,- деді А. Рахымғалиев.
Жиында бірқатар мәселелер ортаға салынды. Атап айтсақ, жылу жүйелерін модернизациялау бағдарламасы шеңберінде, шаһардағы № 1 ЖЭО және РК-1 орталықтарын қайта жаңғырту бойынша құрылыс жұмыстары соңына жетіп қалғаны мәлім болды. Оның нәтижесінде қазандықтардың техникалық мүмкіндіктері қалыпқа келтіріліп, қуат тапшылығы мәселесі біржолата шешіледі деп күтілуде. Сондай-ақ Семейдің оң жақ жағалауындағы жылу нысандарын реконструкциядан өткізу мақсатында «Нұрлы жол» бағдарламасы аясында республикалық қазынадан 1,8 млрд. теңге бөлініпті.
Қоғамдық тыңдаудың соңында сөз алған қала әкімі Ермак Сәлімов еліміз үшін осындай жауапты кезеңде атқарушы билік шаһардың жылу мәселесін басты назарда ұстайтындығын жеткізіп, әлеуметтік жағынан аз қамтылған тұрғындарға коммуналдық қызметті өтеу барысында көмек берілетіндігін айтты.
— Тариф бағасын көтеру — мекеменің жағдайына байланысты туындаған мәжбүрлік. Коммуналдық қызметтер өздерінің шығынын азайтуы қажет. Сол бағытта олар бірқатар жұмыстарды қолға алып, атқаруы тиіс. Бүгін біз мекеменің кірісін арттыру жайлы көп әңгіме қозғадық. Алайда апатты жағдай туындағанда, не істеу қажет деген сауал қойылмады. Осы орайда апатты сәтте шұғыл әрекет ететін арнайы құрылым жасақтауымыз қажет деп ойлаймын. Мәселен, түнгі сағат 1-де үйімізде құбыр жарылса, қайда хабарласатынымызды білмей қиналатынымыз жасырын емес. Сондықтан да осы бағытта іс-әрекет жасайтын қызметті құру қазіргі уақыттың басты талабы болып отыр. Мұны алдағы уақытта егжей-тегжейлі зерделеп ойластыратын боламыз. Сонымен қатар коммуналдық қызметтерді төлеуге мүмкіндігі жетпейтін, әлеуметтік тұрғыдан қамтылмаған тұлғаларға нақты көмек көрсету қолға алынады. Бұл бағытта тиісті шаралар атқарылып жатыр. Алаңдауға еш-қандай себеп жоқ,- деп түйіндеді өз сөзін Ермак Бидахметұлы.
Жақсылық СҮЛЕЙМЕН,
«Семей таңы»
