Семей қаласында Халыққа қызмет көрсету орталықтарының (ХҚКО) 20 жылдығына арналған мерекелік шара өтті. Оған орталықтың қызметкерлері мен ардагерлері, «Азаматтарға арналған үкімет» мемлекеттік корпорациясының басшылары және жергілікті билік өкілдері қатысты. Шара қонақтарының қатарында «Азаматтарға арналған үкімет» мемлекеттік корпорациясы басқарма төрағасының орынбасары Шоқан Әбділманов болды.
Жиын барысында екі онжылдықта атқарылған ауқымды өзгерістер атап өтілді. Қағаз құжаттардан – заманауи цифрлық сервистерге көшу, мемлекеттік қызметтерді бұдан да жедел әрі қолайлы ету жолындағы жетістіктер ерекше көрсетілді.
«20 жыл – жай ғана дата емес. Осы уақыт ішінде ХҚКО әр азамат өзіне қажетті қолдауды табатын, клиентке бағдарланған құрылымға айналды», – деді Абай облысы бойынша «Азаматтарға арналған үкімет» филиалы директорының міндетін атқарушы Мұрат Өмірзахов.
Ол Семейдегі алғашқы орталықтың сол жағалауда, 401-квартал, 21-үй мекенжайында ашылғанын еске салды. Дәл осы нүктеден қаладағы ХҚКО желісінің даму тарихы басталып, көрсетілетін қызметтерді кеңейту, процестерді жетілдіру арқылы бүгінгі заман талаптарына сай формат қалыптасты.
Шара соңында ХҚКО-лардың қалыптасуы мен дамуына үлес қосқан ардагерлер мен үздік қызметкерлер марапатталды. Бұл құрмет көрсету мерекенің маңызын арттырып, жүйенің бастауында тұрған азаматтардың еңбегін айрықша атап өтті.
