Semeytany.kz – Қытайда 25 жастағы Чжао Тэчжу есімді бойжеткен жабайы табиғатта 35 күн жалғыз өмір сүріп, экстремалдық «өмір үшін күрес» ойынында үшінші орын иеленді. Бұл туралы South China Morning Post басылымы хабарлады.
Реалити-ойын 1 қазанда Чжэцзян провинциясындағы аралдардың бірінде басталған. Чжао Тэчжу 5 қарашаға дейін шыдап, нәтижесінде 7,5 мың юань (шамамен 550 мың теңге) көлемінде жүлде алған. Оның айтуынша, осы уақыт аралығында теңіз шаяндары, теңіз кірпілері, моллюскалармен қоректеніп қана қоймай, аралдағы егеуқұйрықтарды жеуге де машықтанған.
Қатысушы кеміргіштерді ұстап, терісін сылып, отқа қақтап жегенін айтқан. Бір айдың ішінде ол шамамен 50 егеуқұйрықты тұтынған. Осындай күйзелісті жағдай мен әдеттен тыс ас мәзірінің салдарынан Тэчжу 14 келі салмақ тастап, 85 килодан 71 килограмға дейін арықтағанын жеткізген.
Ойыншы 4 қараша күні аралға тайфун соққанын, сол оқиғадан кейін жарысты жалғастырудан бас тартуға шешім қабылдағанын айтты.
«Мен өз алдыма қойған мақсатыма жеттім. Енді үйіме барып, өз төсегімде қанып ұйықтағым келеді», – дейді Чжао Тэчжу.
Ұйымдастырушылардың мәліметінше, аралда әлі екі ер адам қалып, 50 мың юань (шамамен 3,6 миллион теңге) көлеміндегі бас жүлде үшін сынға түсіп жатыр. Чжао Тэчжу болса жарыс нәтижесі өзінің күткенінен де жоғары болғанын айтып, болашақта да осындай сайыстарға қатысуды жоспарлап отырғанын, сондай-ақ тағы 15 килограмм салмақ тастауды мақсат етіп отырғанын жасырмаған.
