Тамыздың 28-29 күндері шаһарымыздағы Семей мемлекеттік медицина университетінің ғылыми базасында Б. Атчабаров атындағы «Экология. Радиация. Денсаулық» атты XІ дәстүрлі халықаралық ғылыми-тәжірибелік конференция болып өтті. Жылдағы дәстүрге сай ұйымдастырылатын аталмыш шара барысында радиациялық экология мен қауіпсіздік, сонымен қатар экологиялық нашар аймақтарда тұратын халықты емдеу және оңалту мәселелері мамандар тарапынан талқылауға түсті.
Қалыптасқан үрдіске сай, халықаралық ғылыми-тәжірибелік конференцияның жұмысына Жапония, Ресей, Қырғызстан, Тәжікстан және тағы басқа елдердің танымал ғалымдары қатысты. Айта кету керек, Ұлт Көшбасшысы Н.Назарбаевтың тапсырмасы бойынша Семей ядролық сынағының зардабын шегуші халықты оңалту мақсатында бірқатар ілкімді шаралар қолға алынған. Соның ішінде әсіресе медицина саласындағы ғалымдар жұмысына айрықша мән берілген. Конференция барысында аталмыш тақырып зерттеушілер тарапынан барынша терең қозғалып, тұшымды баяндамалар жасалды.
{jcomments on}Конференция барысында құрметті қонақтардың қатарында Нагасаки университетінің вице-президенті Шуничи Ямасита, Нашим медициналық Ассоциациясының президенті Ясуши Макимото, Санк-Петербург оңтайландыру дәрігерлер кеңесінің төрағасы, осындағы ғылыми-әдістемелік орталығының басшысы В.Ковальчук, Нагасаки университетінің вице-президенті Суничи Ямашита, Шиманэ қаласындағы Жапония университетінің экс-президенті Шотаи Кобаяши, Еуразиялық ракты зерттеу институтының Президенті Нұрбек Игісінов, Қырғыз Республикасының Ұлттық онкологиялық орталығы директорының орынбасары Энвербек Соодонбеков, Тәжікстан Республикасының республикалық онкологиялық ғылыми орталығы директорының орынбасары Диловар Ганиев және басқа да жаһандық деңгейдегі ғалымдар болып, ғылыми басқосудың салмағын арттыра түсті. Бір бұл емес, конференцияға Қазақстан Республикасы Денсаулық сақтау және әлеуметтік даму министрлігінің, емдеу-профилактикалық мекемелерінің, қалалық және облыстық әкімдік, ғылыми-зерттеу орталықтарының, еліміздің және ТМД елдерінің зертханаларының, облыстық және қалалық денсаулық сақтау департаменттерінің өкілдері қатысты.
Конференцияда жиналған оқымыстылар өздерінің пайымды пікірлерін, зерттеулерін ортаға салды. Секциялық отырыстарда радиациялық экология және радиациялық қауіпсіздік тақырыбында баяндамалар жасалды.
– Бүгінде бүкіл әлемге әйгілі бір жайт — Семей полигонының жабылуы – күллі бейбітшіліксүйгіш жаһан жұртшылығы үшін ерекше тарихи оқиға. Алайда бұл ғасыр алапатының салдары ұзаққа созылғаны белгілі. Ендігі арада дәрігер-ғалымдар үшін тың тапсырмалар бар. Ол – радиа-циядан зардап шеккен тұрғындарға медициналық көмек беру және оңалту ісі. Біз бұл ретте баршамыз бірігіп, бірлесіп әрекет етуіміз керек, — дейді Нагасаки университетінің вице-президенті Суничи Ямашита. — Ал бұл жолғы конференция біз үшін өте маңызды. Жапондық ғалымдар бұған дейін көптеген елдердің ғылыми-зерт-теу институттарымен байланыс орнатып келдік. Ендігі арада Қазақстан арқылы ТМД елдерінің ғалымдарымен тізе қосып жұмыс істей аламыз. Бұл жұмыс енді жалғасын таба беретін болады, — дейді жапондық ғалым.
Сонымен қатар конференцияның алғашқы күніндегі ғылыми басқосудың салтанатты түрдегі ашылу рәсімі өтті. Оған қатысқан қала әкімі Ермак Сәлімов барша жиналған ғалымдарды, онколог мамандар мен радиология саласында зерттеу ісін жүргізіп жүрген кәсіби мамандарды арнайы құттықтады. Сонымен қатар осынау шара барысында медицина университетінің ректоры Төлеубай Рахыпбеков қала әкімін оқу орны аясында жаңадан ашылған кабинеттермен таныстырды. Солардың арасындағы бірегейі — «Астана» кабинеті. Бұл дәріс бөлмесі студенттер қауымына патриоттық тәрбие беру мақсатында ашылып отыр. Ал жапондық-этнографиялық үлгіде ашылған арнайы бөлме тіптен ерекше. Мұнда әсіресе Жапония елінен келген делегация мүшелері ұзағырақ аялдады.
Ал Б.Атчабаров атындағы «Экология. Радиация. Денсаулық» тақырыбындағы ғылыми-тәжірибелік конференциясының жабылу рәсімі ертеңгісін 29 тамыз күні қорытындыланды.
Қуаныш ЖОЛЫМБЕТ,
«Семей таңы»
