Жыл сайын қазан айының екінші жексенбісінде елімізде мүмкіндігі шектеулі жандар күні аталып өтеді. Семейде бұл күні мүмкіндігі шектеулі жандардың қажеттіліктеріне баса назар аудару дәстүрі қалыптасқан. Осы ретте атаулы күнге орайластырылған шаралар шаһардағы жалпы білім беретін № 20 және № 4 мектептерінде де өтті. Атап айтсақ, екі мектепте де Шығыс Қазақстан облысындағы БҰҰ Бірлескен бағдарламасы аясында мүмкіндігі шектеулі балаларға арналған модульді алаңдар ашылды.
Арнайы жабдықтармен жасақталған орынның бірі — № 20 жалпы білім беретін орта мектеп базасында ашылса, аутизммен ауыратын балаларға арналған сынып № 4 орта мектеп ғимаратында орналастырылды. Аталған жобаларды БҰҰ-ның қаржылай қолдауымен «Құқықтық сана академиясы» ҚҚ мен «Ерекше әлем» ҚҚ жүзеге асырып отыр. Ондағы мақсат — оқыту мен тәрбиелеуде қиындық тудыратын балаларды тиімді емдеу-сауықтыру және психологиялық-педагогикалық көмек көрсету.
{jcomments on}Шығыс Қазақстан облысындағы БҰҰ Бірлескен бағдарламасының негізгі жұмыстарының бірі — өңірдегі мүмкіндігі шектеулі жандарға әлеуметтік қызметтерді қолжетімді ету. Бұл жолғы жобалардың жүзеге асуы да осы мақсаттардың орындалуына негізделсе керек.
Жоба аясында алғаш болып іске қосылған қаладағы № 20 жалпы білім беретін мектебіндегі мүмкіндігі шектеулі балаларға арналған коррекциялық сынып болды. «Құқықтық сана академиясы» ҚҚ жүзеге асырған жоба аясында сөйлеу қабілеті мен психологиялық дамуы төмен балаларға арналған екі сынып пайдалануға берілді. Келесі жаңашылыққа № 4 жалпы білім беретін орта мектепте көз жеткізуге болады. Мұнда 12 балаға арналған коррекциялық сынып ашылды. Онда сөйлеу қабілеті төмен, аутизм дертіне шалдыққан балаларды қабылдайды. Мұнда әлеуметтік ортаға бейімдеуге, оқытуға жағдай жасайды. БҰҰ жоба менеджері Рауан Қалиевтің сөзіне сүйенсек, игі істің жүзеге асуына Семей қалалық әкімдігі және білім бөлімі де мұрындық болған.
— Аталмыш жобалардың мақсаты — мүмкіндігі шектеулі балаларды қоғамға бейімдеу және алғашқы білім алуларына толықтай мүмкіндік жасау. Бүгінгі таңда жеткен жетістіктеріміз көп. Себебі осындай коррекциялық сыныптан, жалпы сыныпқа ауысып жатқан балалар бар. Ол біз айтып отырған әлеуметтендіру мәселесінің оң шешіліп жатқанын көрсетеді. Бұл жұмыстар алдағы уақытта да жалғасатын болады, — дейді Р.Қалиев.
Жалпы, әрбір жобаның құны 1 млн. 800 мың теңге. Бұл қаражатқа арнайы оқу құралдары, сыныпқа арналған жабдықтар және балаларға арналған демалу бұрыштары алыныпты. Жоба аясында білім бөлімі тарапынан арнайы штат бөлініп, оларға Астанадан келген мамандар семинарлар жүргізген.
«Ерекше әлем» қоғамдық қорының директоры Арайлым Әлімжанованың айтуынша, коррекциялық түзету сыныптарында арнайы мұғалімдермен қатар психологтар мен логопеттер де жұмыс жүргізетін болады. Олар қажет болған жағдайда аутизмге шалдыққан балаларды төрт жылға дейін тәрбиелемек. Дегенмен нәтиже жақсы болса, балдырғандар бірден қарапайым сыныптарға ауысуға мүмкіндік бар. Жалпы, мамандар егер аутизммен күресті жаппай жүргізсе, науқастардың санын азайтуға болатынын айтады. Бұдан бөлек, аутизмге шалдыққан балалармен дұрыс жұмыс жасалса, олардың көбі қоғамға сіңіп, мектептерде білім алуына мүмкіндігі бар көрінеді.
— Аутизм дертіне шалдыққан балаларды музыка, техникаға тәрбиелесе, жақсылап үйретіп, көрсететін болса, болашақта олардан сол саланың жақсы маманы шығуы мүмкін. Егер баланы ерте жастан емдеп тәрбиелеген жағдайда, жеті жасында қарапайым балалармен сабаққа да бара алады. Өкнішке орай қаламызда ондай орталықтар жоқ. Біздің қор қазір мектеп жасына дейінгі балалармен айналысатын орталық ашуды жоспарлап отыр. Осы бағытта жұмыстар атқарылуда, — дейді «Ерекше әлем» қоғамдық қорының директоры Арайлым Әлімжанова.
Асан МЫРЗАХАНОВ,
«Семей таңы»
