Аптаның сәрсенбі — бейсенбі күндері Семейдегі «Солтүстік» сауда-логистикалық орталығында Қытай Халық Республикасының ШҰАР ауданы кәсіпкерлерінің ұйымдастыруымен жәрмеңке өтті. Бұл жолы аталмыш жаңа нысанда көршілес елдің ауылшаруашылық өнімдерін өндіруші компаниялары өкілдерінің 10-шы көрмесі өңір тұрғындарына есік ашты.
Қытайдың Шыңжаң ұйғыр автономиялы ауданы Шығыс Қазақстан облысымен ең сенімді сауда әріптесі саналады. Тіпті, екі мемлекет арасындағы тауар айналымының басым бөлігі осы аймақтар арқылы өтетіні белгілі. Бұл жолы да қытайлық кәсіпкерлер мол өніммен келіпті. Таң алагеуімнен сауда сөрелерін өз тауарларымен толтырып тастады.
Көпшілікке негізінен көкөніс, азық-түлік, түрлі тұрмыстық бұйымдар ұсынылды. Арасында қазақы нақышты тауарлар да кездесіп жатты. Мәселен, ою-өрнекпен әшекейленген әмиян, орындық, төсек жабындылары, түскиіз келушілер назарын бірден аударды. Сонымен қатар ұлттық тағам түрлері де жәрмеңкенің басты ерекшелігі болды. Мәселен, Шәуешек қаласындағы «Асар» ЖШС шығарған түрлі талқан өнімдері арнайы қораптармен сатылды.
— Біздің зауытымыз 17 түрлі өнім шығарады. «Мұсылманша» атты тауар белгісі бойынша табиғи таза жарма түрлерін негізінен ішкі нарықта саудалаймыз. Ал бүгінгі бидай, арпа, жүгері, тары талқандары мен жентті арнайы қорапталған қалыпта алғаш рет Қазақстанға әкеліп отырмыз. Алайда семейліктердің басым көпшілігі бұл дәстүрлі тағам түрлерін біле бермейді екен. Мәселен, біздің зауытымызда өндірілетін «шай жент», «май жент», құйрық майға қуырылып бөрттірілген бидай сынды дастарқан сәнін келтірер тағамдарды бүгінде тіпті қытай ұлты да көптеп сатып алады. Сонымен қатар көршілес Моңғолияға да саудалаймыз. Жалпы, осы сапарымызда қандай тауар түрі өтімді екенін анықтап, Қазақстанның Шығысынан жаңа әріптестер тауып, сауда айналымын дамыту негізгі мақсатымыз, — дейді Шәуешектегі «Асар» ЖШС директоры Бауыржан Төлешұлы.
Сонымен қатар қытайлық тауар көрмесі барысында «Руи Хуа Кран» компаниясының ауылшаруашылық техникалары үлгілерінің таныстырылымы да өтті. Ынта білдірген семейліктер түрлі машиналарды тапсырыспен Қытайдан алдыра алады. Сонымен қатар ШҰАР-дың Тарбағатай ауданынан келген «Юң Шың» ЖШС, Дөрбілжін ауданынан келген «Қара қыз» ЖШС өнімдері де семейліктер назарын аударды.
Ал осы сәттерде нысан ауласында қытайлық ауылшаруашылық өнімдерін өндірушілердің 10-шы көрмесінің салтанатты ашылу рәсімі өтіп жатқан болатын. Көпшілік алдында сөз алған қалалық кәсіпкерлік бөлімінің басшысы Марат Нүгеров қытайлық әріптестерге алғыс білдіре отырып, екі елдің қос аймағы арасындағы сауда әріптестігі алдағы уақытта жаңа қырынан көрініс табатынына сенім білдірді. Ал ҚХР ШҰАР ауылшаруашылық компаниясының басшысы Жың Шуиң ханым өз сөзінде Қазақстандағы «Нұрлы жол» мемлекеттік бағдарламасы аясында байырғы Жібек жолын қайта жаңғыртып, екі елдің арасындағы достық, ынтамақтастық, сауда һәм әріптестік қатынастарды дамытудың маңыздылығына тоқталып өтті. Сонымен қатар осынау көрмені ұйымдастыруға ықпал етіп, қошеметпен қарсы алған Семей қаласы әкімдігіне алғыстарын білдіретінін жеткізді.
Жалпы, бұл күнгі шара барысында Қытай елінен келген 30 фирманың тауарлары келушілер назарына ұсынылды. Аталмыш жәрмеңкенің екі жақты сауда айналымына ықпал етіп, қос елдің кәсіпкерлеріне іскерліктің жаңа көкжиектерін ашатыны анық.
Қуаныш ЖОЛЫМБЕТ,
«Семей таңы»
