Апта басында қаланың сол жағалауының тұрғындары игілікті бастаманың куәсі болды. Дәлірек айтқанда, «Металлист» ЖШС-нің бас директоры Айдос Серікқалиұлы мен Семей қаласы әкімінің қоғамдық кеңесшісі Жасұлан Құрманғалиевтың бастамасымен шаһардың сол жағалауындағы қалалық Офицерлер үйі маңында орналасқан демалыс орнына көріктендіру, көркейту жұмыстары жүргізілді.
Жол бойындағы демалыс орнын көріктендіру мәселесін қала тұрғыны Гүлдана Әмренова қала әкімінің жуырда өткен есептік кездесуінде көтерген екен. Жас белсенді Жасұлан Құрманғалиев пен кәсіпкер Айдос Серікқалиұлы аталмыш мәселені жерге қалдырмай, бірден қолға алуға кірісіпті.
— Қала әкімінің Офицерлер үйінде өткен тұрғындар алдындағы есептік кездесуіне мен де қатысқан болатынмын. Сол кезде қала тұрғыны осы демалыс орнының күл — қоқысқа толы екенін жеткізді. Осы ақпаратқа қанық болғаннан кейін Айдос Серікқалиұлымен бірге бұл мәселені ретке келтіруді ойластырдық. Ағаштарды әктеп, орындықтарды қалпына келтіріп, айналаны тазартатын боламыз. «Металлист» кәсіпорнының қызметкерлері де бұл шараға қатысуға ниет танытты. Бұған қоса осы жердегі жарық шамдарды ретке келтіріп, оған электр қуатын тарту көзделуде. Сонымен қатар ағаш отырғызуды да жоспарлап отырмыз. Қала тазалығын сақтау барлық семейліктердің ортақ шаруасы деп білемін. Сондықтан да әр қала тұрғыны өз аудандарын тазалап, оны көркейтуге атсалысса, қаламыз көркейе түсер еді. Осы бағыттағы шараларды шаһардың өзге де аудандарында жалғастыратын боламыз. Ол алдағы уақыттың еншісінде,- дейді Жасұлан Құрманғалиев.
Белсенділердің атқарған жұмыстарын өз көзімен көрген Гүлдана Әмренова бастамашыл топқа ризашылығын айтып, енді демалыс орнына серуендеп келетін халықтың саны артатындығына сенімді екенін жеткізді.
— Осы шағын саябаққа жиі келемін. Бұл жерде үнемі тұрмыстық заттардың қалдықтары толып жататын. Жүру мүмкін емес еді. Қаланың азаматшасы ретінде жүрегіміз ауыратын. Әкімнің есептік кездесуінде осы сұрақты көтеруге мүмкіндік туды. Айтқан ұсынысым назардан тыс қалған жоқ. Жасұлан Құрманғалиев пен Айдос Серікқалиұлына айтар алғысым шексіз. Өз қаржыларына бірнеше күн бойы осы саябақты жөнге келтіруде. Семейде осындай азаматтар көп болса екен. Туған қаламызды таза қалыпта ұстау әр тұрғынның міндеті деп санаймын,- деді Гүлдана Сапарғалиқызы.
Жақсылық СҮЛЕЙМЕН,
«Семей таңы»
