«Нұр Отан» партиясының Семей қалалық филиалындағы қоғамдық қабылдауды бұл жолы филиал төрағасының бірінші орынбасары Зульфия Жамалтдинованың өзі өткізді.
Қоғамдық қабылдау барысында қаралған мәселелер мазмұнына үңілсек, азаматтар, негізінен, жер телімін алу, жұмысқа орналасу, алимент өндіру, туысқандарына кесілген қылмыстық жазамен келіспеушілік сынды мәселелермен жүгінді. Шағымданып келгендердің сұрақтары көзбе-көз талқыланып, тиісінше кеңестер берілді. Азаматтардың сауалдарына қатысты мемлекеттік мекемелерге қолма-қол хабарласқан кезде, олардың құқықтарының бұзылмағандықтары анықталды.
Сонымен қатар нақты шешімін тапқан бір мәселеге тоқталсақ, партия филиалы төрағасының бірінші орынбасары Зульфия Фазылжанқызы қаламыздағы мекемелер мен кәсіп-орындарға хабарласа отырып, қысқартуға түскен азаматты қайтадан жұмысқа орналастырды. Атап айтсақ, Дүйсенғазы Дәуленов есімді Семей қаласының тұрғыны осыдан екі ай бұрын Цемент зауытындағы жұмысынан қысқарып қалған екен.
Қабылдау кезінде Д.Дәуленов: «Жұмысымнан қысқарғаныма 2 ай болды. Мойнымда банктен алған несием бар. Осы және өзге де жағдайлар мені тығырыққа тірей бастады. Негізгі кәсібім — көлік жүргізушісі. Қаланың көптеген мекемелеріне бардым, ешқайсысы жұмысқа алмады. Басқа қолдан ештеңе келмеген соң, «Нұр Отан» партиясының көмегіне үміт артып келіп отырмын. Сіздерден бір ғана өтінішім бар, жұмысқа орналасуға көмектесулеріңізді сұраймын. Отбасымның асыраушысы болғандықтан, бос отыру қиын екен»,- деп жұмыссыздықтың жанына қатты батып жүргенін ақтарыла айтып берді.
Өтініш білдіруші азаматтың мәселесі бойынша З.Жамалтдинова шаһардағы бірнеше кәсіпорынға қоңырау шалып, көлік жүргізушіге орын бар-жоғын анықтау кезінде «Спецавтобаза» ЖШС-де «КамАз» көлігіне жүргізуші қажет екендігі мәлім болды. Сол сәтте-ақ филиал тарапынан аталмыш кәсіпорынға қатынас хат жолданып, Д.Дәуленов өз мамандығы бойынша жұмысқа орналасуға мүмкіндік алды.
«СТ»-ақпарат.
