Семей қаласында ШҚО Білім басқармасы, Қазақстан Республикасы Білім және ғылым министрлігімен бекітілген кестеге сәйкес, 2016 жылы Ұлттық бірыңғай тестілеу (ҰБТ) және оқу жетістіктерін сырттай бағалауды (ОЖСБ) ұйымдастыру және өткізу мәселелері бойынша кеңес отырысын өткізді. Кеңес жұмысына Қазақстан Республикасының Білім және ғылым министрлігінің Білім және ғылым саласындағы бақылау комитетінің басшысы Зинаш Жандильдина арнайы қатысты.
Аталған шараға ШҚО білім саласын бақылау департаментінің директоры Еркінбек Аязбаев, Семей қаласы әкімінің орынбасары Надежда Шарова, сондай-ақ Бесқарағай, Бородулиха, Абай, Аягөз аудандары мен Курчатов қаласы әкімдерінің орынбасарлары, білім бөлімдерінің мамандары, мектеп директорлары, ҰБТ өткізу пункттерінің жетекшілері мен мамандары, ата-аналар мен оқушылар қатысты. Жиынның негізгі мақсаты Ұлттық бірыңғай тестілеуді және оқу жетістіктерін сырттай бағалауды өткізудегі және ұйымдастырудағы білім саласындағы заңнамаларға, нормативтік-құқықтық актілерге, ережелерге түсініктер беру, жергілікті жерлердегі аталған шараларды ұйымдастыруға қатысты мәселелерді анықтап, оларды шешу жолдарын қарастыру болып табылды.
Семинарда ҚР Білім және ғылым министрлігінің Білім және ғылым саласындағы бақылау комитетінің басшысы Зинаш Жандильдина баяндама жасады. Зинаш Жанділдақызы аталмыш кездесуді өткізу дәстүрге айналғанын, Ұлттық бірыңғай тестілеу Мемлекет басшысының бұйрығымен енгізілгенін, осы уақыт аралығында ҰБТ-ға 1 млн. 505 мың мектеп бітіруші қатысқанын атап өтті. Ол сондай-ақ осы аралықта жоғарғы оқу орындарына түскендердің 60 пайыздан астамы ауыл мектептерінің түлектері екендігін жеткізді.
— Осы уақыт аралығында тестілеудің қағидалары мен технологиясына өзгерістер енгізіліп, жетілдіріліп келеді. Министрліктің жұмыс тобы жыл сайын қоғамдық ұйымдардың ұсыныстарын ескере отырып сараптама жүргізеді. Соңғы жылдары сараптама жұмыстарына үкіметтік емес ұйымдар да белсенді қатысып келеді. ҰБТ-ны жетілдірудегі көпшіліктің ұсынысы бойынша 2017 жылдан бастап тестілеу форматын екі рәсімге бөлу туралы шешім қарастырылуда. Бүгінгі күні нақты шешім қабылданған жоқ. Қазір ел көлемінде әлі де ұсыныстар қабылданып жатыр. Ал аталмыш жаңашылдық нәтижесінде мектептерге сенім артылып, мұғалімдердің дәрежесі артпақ,- деді ҚР Білім және ғылым саласындағы бақылау комитетінің басшысы Зинаш Жандильдина.
Министрліктің өкілі сондай-ақ тест өткізу технологиясы, оған қатысушылар, тестілеуден босатылғандар, сынақ өткізу мерзімі, тестілеу барысындағы құқық бұзушылықтар, тыйым салынған заттар, тестілеудің нәтижелерін жариялау, апелляциялық комиссия мен 2016 жылғы ҰБТ базасының жаңартылуы туралы да кеңінен баяндап берді. Тест сұрақтарының жаңартылуы туралы сөз қозғаған Зинаш Жанділдақызы ағымдағы жылы логикалық сипаттағы тапсырмалардың көбейгенін, тест тапсырмаларына диаграмма, сурет, таблица, сызбалар, сондай –ақ жазбаша деректермен, тарихи құжаттармен жұмысты қажет ететін тест тапсырмалары енгізіліп отырғанын атап өтті. Осы орайда ол слайд арқылы бірқатар тест тапсырмаларының үлгісін де көрсетті. Зинаш Жандильдина баяндама барысында бұл атқарылып жатқан жұмыстардың оқушылар үшін тиімді болатынына сенім білдірді.
— Осы жүргізіліп жатқан өзгерістер оқушыларға тиімді болады деп ойлаймын. Берілген мәліметтер аз болған жағдайда, ата-аналар сынып жетекшілерінен ақпаратты жеке алуларына болады. Қағидадағы өзгерістер осы рәсімді дұрыс өткізіп, жоғарғы оқу орындарына студенттерді әділ түрде қабылдау үшін жасалып жатыр. Сондықтан ағымдағы жылғы ҰБТ жоғарғы деңгейде өтеді деп ойлаймын. Жалпы, Шығыс Қазақстан облысы тәртіп жағынан жаман емес. Алдағы уақытта осы бағыттағы жұмыстар ары қарай жалғасын тауып, оқушы білімін объективті түрде бағалау үшін, жергілікті органдар тарапынан барлық жағдай жасалады деген үміттеміз,- деді З.Жандильдина.
Семинарда Зинаш Жандильдина күн тәртібіндегі мәселеге қатысты жиынға қатысушылар тарапынан қойылған сұрақтарға жауап берді. Баяндамада ҰБТ-ны өткізу мен ұйымдастыру шаралары барысында туындайтын жағдайларға қатысты түсініктер беріліп, өңір бойынша соңғы жылдардағы ҰБТ көрсеткіштеріне де талдау жасалды.
Асан МЫРЗАХАН, «Семей йтаңы»
