«Спартак» стадионында республикалық балалар мен жасөспірімдер арасындағы «Coca-cola былғары доп — 2016» турнирінің ақтық ойындары болып өтті. Қазақ футболының отаны болып саналатын Семей төрінде биыл аталмыш сайыс 10-шы мәрте ұйымдастырылды.
Жарыстың негізгі мақсаты балалар мен жасөспірімдер футболын дамыту әрі өскелең ұрпақтың арасында салауатты өмір салтын насихаттау болып табылды. Әр жыл сайын бұл турнирге еліміздегі 6 200 мектептен 400 мыңнан аса балалар қатысуға ниет танытады екен. Сондай-ақ дәл осы сайыстан қазақ футболының жарық жұлдыздары Бауыржан Исламхан, Рауан Сариев, Сергей Хижниченко сынды бірқатар саңлақтар шыңдалып шыққанын да айта кету керек. Бұған қоса «Coca-cola былғары доп» додасы Еуропа футбол ассоциациясы одағы (УЕФА) тарапынан балалар спортының өркендеуіне қосқан үлестері үшін екі мәрте арнайы дипломдармен марапатталыпты. Ал Семей жерінде өткізілген ойындарға келер болсақ, 200-ден аса балғын аяқдоп шеберлері кіші жас тобы бойынша өзара кіл мықтыны анықтады. Олар қаладағы «Турист» және «Цементник» алаңдарында сынға түсті. Ақтық ойын «Спартак» алаңында өрбіді.
Шешуші кездесуде Қарағанды және Атырау облысы командаларының жолы түйісіпті. Ойынның негізгі уақыты 1:1 есебімен аяқталғандықтан, жеңімпаз команданы пенальти сериясы арқылы анықтауға тура келген. Оның нәтижесінде сарыарқалықтардың айы оңынан туып, мерейлері үстем болды. Қорытынды есеп – 5:4 (1:1 негізгі уақыт), Қарағанды облысы құрамасының пайдасында. Осылайша, қарағандылық балғындар «Coca-cola былғары доп — 2016» кубогінің иегерлері атанды. Ал кездесу барысында жанкештілік танытып, соңына дейін күрескен мұнайлы өлкенің ұландары күміс медальді қанжығалады. Үздік үштікті Жамбыл облысының құрамасы түйіндеді.
— Құрметті жарысқа қатысушылар әрі қала қонақтары! Игі дәстүрге айналған «Coca-cola былғары доп» турнирінің ағымдағы жылғы сайысы да мәресіне келіп жетті. Айтулы турнир 10 жыл көлемінде біздің қаламызда үзілмей ұйымдастырылып келеді. Барлық жеңімпаздар мен жүлдегерлерді Семей қаласының әкімі Ермак Бидахметұлы Сәлімовтің атынан және өз атымнан шын жүректен құттықтауға рұқсат етіңіздер. Бұл жобаны қолға алған ұйымдастырушыларға ризашылығымызды білдіреміз. Осы жарыс арқылы балалар үлкен тәжірибе жинақтайтыны анық. Бұл олардың келешекте кәсіби спортпен айналысуына жол ашады. Сіздерден еліміздің абыройын асқақтататын болашақ футбол дүлдүлдері шығатынына біз күмән келтірмейміз,- деді қалалық дене шынықтыру және спорт бөлімінің басшысы Мұрат Құржықаев.
Сонымен қатар «Үздік шабуылшы», «Үздік қақпашы» және «Үздік ойыншы» сынды аталымдар бойынша сайыс барысында ерекше көзге түскен бірнеше жас сайыскерлер марапатталды. Балғындарға арнайы жүлдені отандық футболдың мақтанышы Андрей Карпович табыс етті.
Жақсылық СҮЛЕЙМЕН, «Семей таңы»
