Семей қаласы әкімдігінде Қалалық қоғамдық кеңестің кезекті отырысы өтіп, оған шаһар басшысы Ермак Сәлімов қатысты. Кеңестің кезекті отырысында бірнеше мәселе қаралды.
Отырыста қаралған алғашқы сұрақ бойынша қала әкімі Ермак Бидахметұлы баяндама жасады. Үш жылдан аса уақыт жер учаскесі тиісті мақсатта пайдаланылмаса, оны заң негізінде қайтарып алуға қатысты жергілікті биліктің қолданып жатқан шаралары жайлы қала әкімі жан – жақты ақпарат беріп өтті.
— Шешім шығарылған күннен бастап 3 жыл уақытта жер учаскесі тиісті мақсатта пайдаланылмаса, онда мұндай жер учаскесі Заңда көрсетілген тәртіппен меншік иесінен және жер пайдаланушыдан мәжбүрлі түрде алынады. Мұндай жерлерді жер қатынастары бөлімі мен жер инспекциясы бөлімі анықтайды және сот арқылы меншік иесінен және жер пайдаланушыдан мәжбүрлеп алып алуға құқылы,- деген қала әкімі барлық іс-әрекеттің заңнама негізінде жүзеге асырылатынын атап өтті.
Жыл басынан бері жер инспекциясына әкімдіктің жер қатынастары бөлімінен 16 жер учаскесінің тізімі жіберілген. Қазіргі таңда ол учаскелердің иелері істен хабардар. Бір жыл уақыт аралығында жерді мемлекет қорына қайтарып алу процесі жүреді. Сонымен бірге 2016 жылдың алғашқы жарты жылдығында иесіз, қараусыз қалған 149 бақша мен саяжайлар заң негізінде мемлекет қорына қайтарылған.
Сондай-ақ, меншік иесі болғанымен, ұзақ уақыт бойы қараусыз қалған бұрынғы Зоовет институтының ғимараты, спорт кешені, армия штабы сынды бірқатар ғимараттар жайлы да қала әкімі арнайы тоқталып өтті.
— Өкінішке орай, ертеректе жекеменшік құрылыс жүргізу алаңы ретінде таныстырылған, бірақ содан бері ұзақ уақыт пайдаланылмай тұрған жерлер қаламызда кездеседі. Иелері сатып алу, сату арқылы меншік иесіне айналған. Заңға сәйкес, ол жерлерді мемлекет меншігіне қайтара алмаймыз,- деген қала әкімі жер иелеріне сот арқылы ескертулер жасалып, меншік аумақтарды тиімді пайдалану мәселесі көтерілгендігін тілге тиек етті.
Жалпы, үстіміздегі жылдың алғашқы жарты жылдығы бойынша 20 мыңға жуық тұрғын тегін жер алу кезегінде тұр. Қала басшысы өз сөзінде Түйемойнақ аралына да тоқталып өтті. Демалыс орнында түлі жазғы кафелер, сауда-сауықтық орындар жүйесіз көбейіп кеткен. Қазіргі таңда бұл мәселе қаралып жатыр, көп ұзамай реттеледі.
Екінші сауал — қоғамдық жолаушылар көлігінің жұмысын жақсарту бағытындағы ТҮКШ бойынша құрылған комиссияның жұмысы талқыланды. Тақырып бойынша Николай Исаев сөз алды.
— Комиссия автовокзалды қала меншігіне қайтарды. 2016 жылдың алғашқы 5 айында 4 млн. теңге қазынаға құйылса, қала меншігіне өткеннен кейінгі 1 айда 8 млн. теңге кіріс кіргізді. Бұл — табысы мол кәсіпорын. Болашақта вокзалдың базасын кеңейтіп, автотранспорттық кәсіпорын құруды жоспарлаудамыз. Әлеуметтік маршуттар ашу жағын да болашақта талқылайтын боламыз,- деді Н.Исаев. Тақырыпқа қатысты Семей қаласының жолаушы тасымалын бақылау орталығының директоры Бейсенғазы Тастекеев қазіргі таңда маршруттар уақытынан кешігіп, кестесін бұзып жүретіндігін айтты. Ондай олқылықтарға жол бермес үшін барлық қоғамдық көліктерге GPS бақылау қондырғысын орнату уақыт талабы екендігін түсіндірді. Бұл мәселе де қаржыға байланысты болашақта реттелмек.
Күн тәртібіндегі үшінші сауал ретінде жергілікті полиция қызметінің материалдық-техникалық базасын жақсарту мақсатында қаржы қорын құру жайы қаралды. Үстіміздегі жылдың қаңтар айынан бастап құрылған құқық қорғаушылардың жұмысы турасында Семей қаласы жергілікті полиция басшысы Радик Сайфутдинов баяндады. Ол, жергілікті полиция өз жұмысын бастағалы, 40936 азамат әкімшілік жазаға тартылып, 226 млн. теңге айыппұл өндірілгендігін атап өтті. Қаржы қоры құрылса, қызметкерлерді компьютер құрылғыларымен жабдықтап, тірек пункттерін жаңалауға мүмкіндік туатындығын жеткізді.
Әйгерім ЖАҚЫП,
«Семей таңы»
