Су – тіршілік көзі. Сапалы ауыз сумен қамтамасыз ету — маңызды мәселе. Осы бағытта тұрғындардың әлеуметтік жағдайын жақсартуға барынша күш салынуда. Сәрсенбі күні Семей қаласының шетінде орналасқан 666-шақырым тұрғындары үшін көптен күткен қуаныш орын алды. Өйткені мұнда су құбыры тартылып, колонка орнатылды.
Аталған ауданның отызға жуық отбасы жиырма жылдан астам уақыт тіршілік көзіне зар болып, ауыз суды тасымалдап пайдаланып келген. Енді сапалы ауыз суды тұтынуларына мүмкіндік туды.
— Мен сияқты жалғыз басты зейнеткер үшін су құбырының болмауы қиындық туғызды. Осыған дейін 5-6 шақырым жердегі Кирпичный кентінен су тасып ішкен едік. Оның қыс мезгілінде қаншалықты қиын екені айтпаса да түсінікті. Су мәселесімен 2004 жылдан бері айналысып келе жатырмыз. Әкімдікке, депутаттарға өтініш айттық. Бізге ауданымыздың картада жоқ екенін, сондықтан әзірге «Ақбұлақ» бағдарламасына ену мүмкін болмайтынын жеткізді. Ал осы көктемде біз депутатымыз Марлен Көкрекбаевпен кездескенімізде, мәселемізді шешетінін айтқан болатын,- дейді 666 шақырым тұрғыны Қайша Тлеубаева.
Бүгінгі күні халық қалаулысы, «Қазақстан темір жолы» АҚ және қалалық әкімдіктің бірлескен жұмыстарының нәтижесінде аталған мәселе толығымен шешімін тапты. Бұл жұмыстар компания мен тұрғындардың жинаған қаражаты есебінен жүргізіліп, жақын маңдағы су арнасынан тартылды.
— Бұл жерде 25 жылдай ауыз су болмаған еді. Бүгін бұл мәселе шешімін тапты. Су темір жол компаниясының орталық су арнасы желісінен келіп отыр. Тариф, есептегіш құралдары сынды барлық жұмыстар реттелді. Енді тұрғындар өз қаражаттары есебінен үйлеріне су құбырын жүргізетін болады. Бүгінгі күні 27 тұрғын үйдің үшеуі үйлеріне су кіргізіп алды,- деді Семей қаласының әкімі Ермак Сәлімов тұрғындармен кездесу барысында. — Бұл — тұрғындардың мәселелерін шешуге атсалысатын депутаттардың жеңісі. Біз тұрғындарды құттықтадық және олардың басқа да мәселелеріне назар аудардық. Бұл ретте олар қоғамдық көліктердің қатынасына көңілдері толмайтынын айтты. Алдағы уақытта осы мәселемен айналысатын боламыз. Қазір желілердің бағыты бойынша оңтайландыру жұмыстары жүргізілуде. Оның барысында 666-шы шақырым тұрғындарының өтініштерін ескеретін боламыз. Бүгінде қала көлемі ұлғайып келе жатыр, сондықтан бұрынғы желілердің бағытын қайта қарастыруымыз керек.
Ал 666 шақырым тұрғындары ауыз судың сапасына және жергілікті биліктің қоғамдық көліктердің желісін жаңартудағы бастамаларына ризашылықтарын білдірді.
— Бұл жерде тұрып жатқаныма бес жылдың жүзі болды. Осы уақытқа дейін ауыз суды 44-ші автобустың соңғы аялдамасынан көлікпен тасып пайдаланған едік. Ауданымызға көктем мен қыс мезгілінде көліктер кіре алмайды. Суды мейлінше үнемдеп пайдаланып келдік. Енді қала әкімі мен біздің округтен сайланған депутатымыздың жүйелі жұмысының нәтижесінде бұл мәселеміз толықтай шешімін тапты. Су құбыры жылдам, айналасы бірнеше күн ішінде орнатылды. Әр отбасынан 28 мың теңгеден жиналды, алайда бұл қаражатты біз қымбатсынып отырған жоқпыз. Өйткені біз сапалы ауыз суға қол жеткіздік,- дейді Әсел есімді тұрғын.
666- шақырым тұрғындары енді бау-бақша салып, мал өсіруді де жоспарлап отыр. Су тіршілік көзі деген — осы.
Асан МЫРЗАХАН, «Семей таңы»
