Сейсенбі күні Семей қаласының әкімі Ермак Сәлімов пен Шығыс Қазақстан облысы прокурорының орынбасары Виталий Шабер қала активіне шаһардың жаңа прокуроры Марат Турубаевты таныстырды.
Шығыс Қазақстан облысы прокурорының орынбасары Виталий Шабер Семей қаласының жаңа прокурорын таныстырды. Ол ҚР Бас прокурорының бұйрығымен Найманов Тәжиден Жүкенұлының Семей қаласы прокурорының лауазымынан босатылып, Батыс Қазақстан облысы прокурорының орынбасары қызметіне тағайындалғанын атап өтті. Сондай-ақ ҚР Бас прокурорының 2016 жылғы 8 тамызындағы №176/6 бұйрығымен Турубаев Марат Тельманұлы Семей қаласының прокуроры болып тағайындалғанын жеткізді. Өз сөзінде Виталий Шабер шаһардың жаңа прокурорына үлкен сенім артылып отырғанын атап өтті.
— Сіздер Марат Турубаевты жақсы білесіздер, өздеріңіздің жерелестеріңіз. Оған үлкен сенім артылып отыр. Бүгінгі таңда қала прокурорына нақты тапсырмалар жүктелді. Жұмыс барысында етене жақын еңбек етесіздер деп ойлаймын. Марат Тельманұлы жүктелген міндеттерді абыроймен орындайды деген сенімдемін, — деді В.Шебер.
Семей қаласының әкімі Ермак Сәлімов жаңа прокурорды құттықтап, құқық қорғау органының заңсыздықпен күресте бірлесе жұмыс жасау қажет екендігін атап өтті. «Семей еліміздегі ең ірі әрі күрделі қалалардың бірі. Қаламызда барлығы заң аясында шешілуде. Осы заңдылықтың орындалуын қадағалау Марат Тельманұлының қызметі. Осы бағытта барлығымыз бірлесе жұмыс жасаймыз деп ойлаймын. Өйткені заңдылықтың сақталуы еліміздің әрбір азаматы үшін маңызды. Жаңа қызметіңізге сәттілік, жеміс тілеймін», — деді қала басшысы.
Марат Турубаев 1971 жылдың 7 тамызында Семей қаласында дүниеге келген. 1998 жылы Қазақ мемлекеттік университетін бітірді. Еңбек жолын 2000 жылдан бастаған ол әр жылдары прокурор көмекшісі, аға көмекшісі, Семей қаласы прокуратурасының мемлекеттік органдар қызметіндегі заңдылықты қадағалау бөлімінің бастығы қызметтерін атқарған. 2010 – 2013 жылдары Семей қалалық сотының судьясы, ал 2013 жылдан 2016 жылдың 8 тамызына дейін Семей қаласы прокурорының орынбасары қызметін атқарған болатын.
Асан МЫРЗАХАН, «Семей таңы»
