Өткен жұма күні Семей қаласының Бизнес және сервис колледжі қабырғасында өткен кеңес отырысында ШҚО колледж директорлары бас қосты. Отырыс аясында «Қонақ үй шаруашылығы қызметін ұйымдастыру» мамандығы бойынша білім алып жүрген студенттерді іс-тәжірибеден өткізу мақсатында колледждің екінші қабатында ашылған қонақ үй бөлмесінің тұсаукесер рәсімі өтті.
Колледж ұжымының қуанышымен ортақтасуға келген Семей қаласының әкімі Ермак Сәлімов заманауи жиһаздармен жаб-дықталған, халықаралық стандарттарға сай етіп жасалған бөлме ішін аралап, игі іске оң бағасын берді. Колледж директоры Альмира Хожанова шаһар басшысын оқу ордасындағы шаштараз, тігін цехы, тағам дайындау зертханасы, сондай-ақ кафе-бармен таныстырды.
– Болашақтың іргесін қалайтын жастар түрлі жұмысшы мамандықтарын талапқа сай меңгере білсе, еңселі еліміздің келешекте алдыңғы қатарлы мемлекеттердің тізіміне еш қиындықсыз қосылуына тамшыдай үлестерін қоса алады,- деді қала әкімі Ермак Сәлімов.
– Жаңа қонақ үй бөлмесінде тәжірибе жинақтау арқылы колледж студенттері «Қонақ үй шаруашылығы қызметін ұйымдастыру» мамандығының қыр-сырын терең меңгеріп шығады. Мұнда олар қонақ үй әкімшісі, қызмет көрсету менеджері ретінде өз біліктіліктерін шыңдай түседі. Қонақ үй әкімшісі қонақ үй бизнесін ұйымдастырудағы маңызды қызметшілердің бірі болып табылады. Себебі ол мейманханаға келген адамды жылы қабылдап, оған сапалы түрде қызмет көрсетуі тиіс. Осы бағытта біз студенттерге, теориялық білім берумен қатар, тәжірибе жинақтауға мол мүмкіндік жасап отырмыз. Қазіргі таңда өңірімізде шағын және орта бизнестің даму қарқыны байқалады. Сондықтан жұмысшы мамандықтар зор сұранысқа ие болып келе жатқанын айту керек,- дейді Бизнес және сервис колледжінің директоры Альмира Хожанова.
Кеңес барысында жиынға қатысушылар онлайн режімінде Ресей Федерациясының Алтай өңірі директорлар кеңесінің төрайымы Валентина Гусевамен тікелей байланысқа шығып, кәсіптік-техникалық жұмысшыларды дайындаудағы бірқатар мәселелерді егжей-тегжейлі талқылады. Айта кетейік, екі тарап арасындағы әріптестік байланыстың орнағанына биыл 15 жыл толып отыр. Валентина Гусеваның сөзіне қарағанда, осы уақыт аралығында кәсіби мамандарды дайындау жолында екі елдің ынтымақтастығы арқасында зор жетістіктерге қол жеткізілді. Кәсіби дайындықтың әлемдегі үздік тәжірибелерін анықтап, оларды техникалық және кәсіби білім беру жүйесіне енгізуді көздейтін «Уорлд Скилс» ұлттық чемпионатына қатысушыларды да екі жақ бірлесіп дайындайтын көрінеді.
Облыстағы барлық колледж директорларының басын біріктірген кеңесте тегін кәсіптік-техникалық білім беру жобасы, оның Қазақстан жастарын жұмыспен қамтуға үлесі зор екені сөз болды. Осы орайда экономиканың серпінді дамушы секторларының бірі елдің кіріс көзі болып табылатын туризм саласына ерекше тоқталған Альмира Хожанова қонақ үй және мейрамхана бизнесі үшін мамандарды даярлау ісі өзекті екенін алға тартады. Өйткені дәл бүгінгі заманда тәжірибелі, қоршаған ортаға жылдам бейімделетін, кез келген жағдайда шешім қабылдай алатын, бәсекеге қабілетті кәсіпқой мамандар керек. Сондықтан мектеп бітіруші түлектер арасында кәсіптік-техникалық мамандықтардың ұтымды тұстарын үгіттеу ісін мықтап қолға алсақ, біріншіден, жұмыс іздеп сенделіп жүрген жастар саны азаяды, екіншіден, Қазақ елінің дамушы өзге мемлекеттермен тең дәрежеде болу мүмкіндігі артады.
Жібек СЕРҒАЗЫ, «Семей таңы»
