Абай облысының Ақсуат ауданында еліміздің түкпір-түкпірінен келген қатысушылар мен қонақтардың басын қосқан «Асыл бесік – Ақсуат» спорттық-мәдени фестивалі өтті. Ұлттық спортты, өнерді, білімді, мәдениет пен рухани құндылықтарды ұштастырған ауқымды шара өңірдегі ең ірі мәдени оқиғалардың біріне айналды.
Республикалық деңгейдегі фестиваль
Фестивальдің салтанатты ашылуына спортшылар, мәдениет қайраткерлері, шығармашылық ұжымдар мен көпшілік қауым қатысты. Ашылу рәсімінде Абай облысының әкімі Берік Уәли құттықтау сөз сөйлеп, фестивальдің маңыздылығына тоқталды.
– Тарбағатайдың баурайында жатқан Ақсуат – халқымыздың тарихы мен тағдырында ерекше орны бар киелі мекен. Бұл құтты өлке ел руханиятына өлшеусіз үлес қосқан талай дара тұлғаны дүниеге әкелді. Сондықтан бүгінгі мерекенің дәл осы қасиетті жерде өтуінің мәні зор. Мемлекет басшысы Қасым-Жомарт Тоқаев: «Біз отаншыл әрі мемлекетшіл болуымыз керек. Өз еліңді сүюден асқан бақыт жоқ. «Менің Отаным, менің елім, менің жерім» деп соққан жүрек ешқандай қиындықтан қорықпайды» деген болатын. Осындай елжанды азаматтар арамызда бар. Осы үлкен мерекенің өтуіне қолдау көрсеткен жерлестеріміз – меценаттар Дулат Тастекеев пен Қайырлы Қасеновке аудан және облыс тұрғындары атынан алғысымды білдіремін. Биыл фестивальдің мәртебесі артып, республикалық мәдени-бұқаралық іс-шаралар тізбесіне енгізілді. Бұл – Ақсуат өңірінің тарихи-рухани әлеуетіне берілген жоғары баға. Бағдарламаның Ырғызбай ата кесенесіндегі тағзымнан басталуы да өткенге құрмет пен рухани сабақтастықтың белгісі. Тоғызыншы рет ұйымдастырылып отырған фестиваль ұлттық спортты, өнерді, білім мен мәдениетті тоғыстырып келеді, – деді облыс әкімі.
Өңір басшысы фестивальдің республикалық мәдени-бұқаралық іс-шаралар қатарына енуі Ақсуат өңірінің тарихи әрі рухани әлеуетінің мойындалғанын атап өтті.
Ұлттық спорт ұлықталды
Фестивальдің басты бағыттарының бірі – ұлттық спорт түрлерін дамыту болды.
Биыл алғаш рет республикалық тоғызқұмалақ турнирі ұйымдастырылды. Сондай-ақ бағдарлама аясында ASSYL ARLAN республикалық қазақ күресі турнирі, аударыспақ жарысы және ASSYL TULPAR ат бәйгелері өтті.
Көпшіліктің ерекше қызығушылығын тудырған ASSYL ARLAN турнирінде Алматы облысының палуаны Мәди Еділбаев жеңімпаз атанып, «Түйе палуан» атағын иеленді. Финалда ол Маңғыстау облысының балуаны, жанкүйерлерге «Қара бура» лақап атымен танымал Нұрдәулет Жарылғаповты жеңіп, бас жүлде – автокөлікті еншіледі.
Ал Екпін ауылындағы ипподромда өткен ASSYL TULPAR бәйгесіне еліміздің әр өңірінен келген жүйріктер мен шабандоздар қатысты. Бағдарламаға 25 шақырымдық аламан бәйге, 15 шақырымдық топ бәйге және 20 шақырымдық «Ақсуат арғымағы» жарысы енді.
Білім мен руханиятқа басымдық
Фестиваль аясында жастардың зияткерлік дамуына ерекше көңіл бөлінді. Соның бірі – кітап оқуды насихаттауға және жастардың дүниетанымын кеңейтуге бағытталған «Артық білім – кітапта» облыстық зияткерлік байқауы болды.
«Мәуліт» шаруа қожалығының жетекшісі әрі фестиваль демеушілерінің бірі Қайырлы Қасеновтің айтуынша, ұйымдастырушылардың басты мақсаты – спортпен қатар ұлттық құндылықтарды дәріптеу, білімге қолдау көрсету және жас ұрпақты тәрбиелеуге үлес қосатын мазмұнды бағдарлама ұсыну.
Театрландырылған қойылымдар мен гала-концерт
Фестивальдің мәдени бағдарламасы театрландырылған қойылымдармен, шығармашылық жобалармен және концерттермен толықты.
Қонақтарға ASSYLTAS театрының «Ауыл кеші көңілді» музыкалық қойылымы ұсынылды. Ал мерекенің шарықтау шегі Ақсуат ауылындағы Ырғызбай Досқанаұлы атындағы орталық стадионда өткен ауқымды гала-концерт болды.
Сахнада BAYANSULU, Әбдіжаппар Әлқожа, BYTANAT, Айдана Меденова, Жасұлан Көпберген, Шұғыла Ешен, Niyazkul және Айбек Серікханов өнер көрсетті.
Ұйымдастырушылардың мәліметінше, мерекелік кешке 10 мыңға жуық көрермен жиналып, думанды шара әсерлі отшашумен қорытындыланды.
Дәстүрге айналған мереке
Бағдарламасы Ырғызбай ата кесенесіндегі тағзымнан басталған «Асыл бесік – Ақсуат» фестивалі ұлттық құндылықтарды сақтап, дәріптеуге бағытталған маңызды мәдени алаң екенін тағы бір мәрте дәлелдеді. Спортты, өнерді, білімді және рухани мұраны тоғыстырған айтулы шара туған жер тарихына тағзым мен ұрпақтар сабақтастығының жарқын көрінісіне айналды.
