Мемлекет басшысы Қасым-Жомарт Тоқаев Абай облысының әкімі Берік Уәлиді қабылдады.
Кездесу барысында Президентке өңірдің әлеуметтік-экономикалық дамуының қорытындылары мен алдағы жоспарлары таныстырылды.
Өткен жылы облыстың жалпы өңірлік өнімі 3,9 трлн теңгеге жетсе, биылғы жылдың алғашқы төрт айында қысқа мерзімді экономикалық өсім көрсеткіші 103,8 пайызды құрады. Инвестициялар көлемі 19,4 пайызға артып, өнеркәсіп, өңдеу саласы, ауыл шаруашылығы, құрылыс және көлік секторларында оң динамика сақталған.
Облыста инвестициялық жобалар саны 29-дан 112-ге дейін көбейген. Ірі жобалардың қатарында Аягөз – Бақты теміржол желісінің құрылысы, Семей қаласындағы жаңа жылу электр орталығы мен тау-кен байыту комбинаты бар.
Сондай-ақ Семейде арнайы экономикалық аймақ құру, Алакөл жағалауының инфрақұрылымын жаңғырту, тұрғын үй-коммуналдық және инженерлік желілерді жаңарту бағытындағы жұмыстар туралы баяндалды.
Кездесу қорытындысында Мемлекет басшысы инвестиция тарту, экономиканы әртараптандыру, инфрақұрылымды дамыту және халықтың өмір сапасын арттыру жөнінде нақты тапсырмалар берді.
Президент «Абайға құрмет» акциясын жоғары деңгейде ұйымдастырудың маңыздылығына ерекше тоқталды.
