Қазіргі күні қаламызда су тасқынынан келген зардаптарды жоюға бағытталған түрлі іс-шаралар қолға алынып жатыр. 2 сәуір күні Электротехникалық колледж жастарының бастамасымен өткен студент жастар сенбілігінің орны бөлек болды. Жүзден астам колледж студенттері шаһардың Пристань аумағында бұрынғы Өзен техникумы маңын тазартты.
Біз сөзге тартқан колледждің техника қауіпсіздігі ұстазы Нұрлыбек Теміров:
— Біз, осы маңды тазартумен қатар, электр сымдарын жалғап, қауіпсіздік шараларын да жолға қоямыз. Біздің басшылық студенттер бастамасын қолдап, алғашқылардың бірі болып тасқын су жүрген аймақты тазартуға кірісуге бел буды. Студенттер мұнымен шектеліп қалмайды, сенбіліктерге шығып, туған қалаларының тазалығы үшін өз үлестерін қосатын болады,- дейді.
Енді осындай студенттік сенбіліктер жоғары оқу орындары мен колледждер тарапынан жиі өтіп тұратын болады. Сенбіліктер арқылы қоғамның басты қозғаушы күші саналатын жастарымыздың қала экологиясына бейжай қарамайтындарына куә болдық.
Сондай-ақ семейлік 20 студент жас Түйемойнақ аралында орналасқан Биологиялық орталыққа да барып, тазалық жұмыстарын жүргізген-ді.
— Қаламызда орын алған төтенше жағдайдан кейін су алған аумақтарды ретке келтіру ісі тек коммуналшыларға ғана емес, бүкіл қоғамға артылған жүк. Кез келген қиындықты бүкіл халық болып жеңу керек. Бәріміз бір жағадан бас, бір жеңнен қол шығарып, істі бірге атқарсақ, жұмыс нәтижелі болары сөзсіз. Мұны Семейдің студенттері жақсы түсінеді,- дейді Облыстық технологиялық колледж директорының тәрбие ісі жөніндегі орынбасары Қайрат Қалиев.
Түйемойнақ аралының басым бөлігін су алған, алайда төтенше жағдайлар қызметінің шұғыл әрекеті арқасында Биология орталығына қарғын су кірмегені көңіл қуантады. Нәтижесінде орталықта мекендеп жатқан аң-құстар дін аман қалды.
— Десек те бүгінгі күні тұрғындардың табиғат — анаға деген қарым-қатынасы алаңдатады. Көктемгі су тасқыны орталыққа еш зардабын тигізбегенімен, арал маңы тұрмыстық заттар қалдықтарына, қоқысқа толып кетті. Бұл – жалпыадамзаттық экологиялық өзекті мәселе. Табиғатқа деген адамдардың қарым-қатынасы өзгермейінше, аумақты тазартуға еріктілер мен жастарды тартудан ғаламдық мәселенің тұтас шешіле салуы екіталай,- деп өз сөзін түйіндеді Биологиялық орталықтың бөлім меңгерушісі Дарья Вощакина.
Серік ӘБІЛҚАСЫМҰЛЫ, «Семей таңы»
