{jcomments off}Өткен жылдың қараша айынан бері бос тұрған Жарма ауданы әкімінің лауазымына АХМЕТҚАЛИ АХАШҰЛЫ НҰРҒОЖИН тағайындалды. Жаңа әкімді кеше аудан активімен облыс әкімінің бірінші орынбасары Ерлан Қапарұлы Айтмұқашев таныстырды.
Ахметқали Ахашұлы Нұрғожин 1966 жылдың 25 мамырында Семей облысы Бесқарағай ауданы Щедруха кардонында дүниеге келген. Ұлты – қазақ, екі жоғары білімі бар. «Nur Otan» партиясының мүшесі.
Еңбек жолын 1983 жылдың 9 қыркүйегінде Бесқарағай ауданында автокөлік паркінде I санатты слесарь болып бастап, бұрынғы Семей облысы Бесқарағай ауданының «Башкуль» совхозында жүргізуші, 1991-1997 жылдары Бесқарағай ауданында бас агроном, 2001-2002 жылдар аралығында Бесқарағай ауданының жер қатынастары инспекциясының бас маманы, 2005 – 2007 жылдары құрылыс — тұрғын үй – коммуналдық шаруашылық, жолаушылар көлігі және автомобиль жолдары бөлімінің басшысы, кейін, 2007-2008 жылдары, Бесқарағай ауданы әкімінің орынбасары, 2008-2015 жылдары Бородулиха ауданы әкімінің орынбасары, 2015-2016 жылдары Шығыс Қазақстан облысы ауылшаруашылық басқармасы басшысының орынбасары қызметтерін атқарды.
2016 жылдың 11 қаңтарынан жаңа қызметке тағайындалғанға дейін Катонқарағай ауданының әкімі болды.
Өмірбаян деректерінен байқап отырған боларсыздар, Ахметқали Ахашұлы Нұрғожиннің есімі Семей өңірінің халқына аса таныс болмағанымен, өзіміздің Бесқарағай жерінің тумасы.
Жарма — аймағымыздағы көп ұлтты, шаруашылығы да сан салалы аудандардың бірі. Бұрын орыс тіліне басымдық беріліп келген Жарма ауданында соңғы жылдары Елбасының «Рухани жаңғыру» бағдарламасы аясында ұлттық құндылықтарды ұлықтау тұрғысында талай игілікті істер атқарылды. Жаңадан тағайындалған аудан басшысы Ахметқали Ахашұлы осы жақсы істерді жалғастырып, Жарманы жаңа қырынан танытады деген сенімдеміз. Қызметіңіз табысты, мәртебеңіз әрдайым биік болсын!
«Семей таңы» — «Вести Семей» газеттері редакцияларының шығармашылық тобы атынан Риза АСАНҚЫЗЫ
