Шығыс Қазақстан облысының тұр-ғындары екі апта уақыт ішінде медициналық бетперделермен толық қамтылатын болады. Аймақ басшысы Даниал Ахметовтің тапсырмасымен және тікелей назарға алуымен өңірімізде арнайы маскалар дайындау ісі жолға қойылды. Бұл орайда тігін кәсіпорындары еш іркіліссіз тәулік бойы жұмыс істейді.
Бетперделердің негізгі көлемін Семей қаласының тігін компаниялары — «Семейспецсанб», «УК Юнис» мекемелері орындамақ. Бұдан бөлек облыстың тағы 10 кәсіпорнымен келісімшарт жасалған.
Жуырда Семей қаласына арнайы жұмыс сапарымен облыс әкімі Даниал Ахметов келген болатын. Аймақ басшысы қаладағы бірнеше мәрте қолданылатын медициналық маскаларды дайындап шығарып жатқан кәсіпорында болып, ондағы жұмыс барысымен танысты.
— Біз тәулігіне 100 мың дана бетперде шығаруды жоспарлап отырмыз. Осылайша, 15 күн ішінде біздің облысты толыққанды қамтамасыз етеміз. Кәсіпорындарға аз ғана уақыт ішінде 6 миллион дана маска шығару міндеті жүктеліп отыр. Шикізат мәселесі шешілді. Өндірістің негізгі көлемін Семей қаласының тігін компаниялары орындайды. Жалпы, облыстың он кәсіпорнымен келісімшарт жасалды. Бүгінгі күннен бастап олардың барлығы тәулік бойы жұмыс істейді, – деп жазды бұл орайда ШҚО әкімі Даниал Ахметов өзінің әлеуметтік желілердегі парақшаларында.
Аймақ басшысының айтуына қарағанда, алғашқы кезекте өндірілген 100 мың маска өңіріміздегі бюджеттік ұйымдарға беріледі.
— Төтенше жағдайларда іске асырылатын жоспарға сәйкес, тауар бірінші кезекте дәрігерлерге, полиция қызметкерлеріне, Ұлттық ұлан сарбаздарына, тәрбиешілер мен мұғалімдерге беріледі,– деп жазды облыс әкімі.
Ал қалған медициналық маскалар аймағымыздағы барлық дәріханаларға арнайы бекітілген бағамен беріледі. Облыс әкімінің сапары барысында айтылғандай, Семейде дайындалып жатқан бетперделердің бір данасының бағасы қаладағы дәріханаларда 100 теңгеден аспайтын болады. Сонымен қатар бөлшек саудадағы тауарлардың бағасы тұрақты түрде бақылауға алынады.
Қазіргі күні кәсіпорын жоғары қарқынмен жұмыс істеуде. Тәулігіне 125 мың дана бірнеше мәрте қолдануға болатын сапалы бетперделер шығарылуда. Бұл — жеке қорғаныш заттарына деген облыс тұрғындарының сұранысын аз уақыт ішінде толық қамтамасыз етуге жеткілікті екенін айтады кәсіпорындағы мамандар. Оған мүмкіндік мол. Бүгінгі таңда «Семейсцецснаб» ЖШС мекемесінде бір ауысымда 70 адам жұмыс істеуде.
— Қазір өзбекстандық фармацевтика компаниясымен келіссөз жүргізіліп жатыр. Бетперделер бірнеше қабаттан тұратын дәкеден тігіледі, — дейді аталмыш мекеменің шикізат жеткізушісі Сәуле Тағаева.
Сондай-ақ, мамандардың айтуынша, бетперделерді әрбір 15 күн сайын ауыстырып, жаңалап тұрса жеткілікті.
Сол тәрізді «УК Юнис» ЖШС мекемесінің де нәтижелі жұмыс істер жатқанын айтуға болады. Әсіресе мақта-мата материалынан жасалатын бірнеше мәрте қолдануға болатын маскалардың сапасын ерекше атап өтуге болады. Бүгінгі күндері тоқыма-тігін кәсіпорны шикізаттың барлық түрін, тіпті резеңкеге дейін өздері өндіреді. Ондағы жұмыс барысына облыс әкімі Даниал Ахметов жоғары баға берді.
Жалпы, аймағымызда арнайы киімдер өндірісі бойынша тапсырыспен жұмыс істеуде көш бастап тұрған «Семейспецсанб», «УК Юнис» мекемелерінде шикізат көлемі жеткілікті. Қажетті медициналық шикізат, дәке, көршілес Өзбекстан мен Ресейден әкелінеді. Қазіргі күннің өзінде 80 тонна материал тігін цехына жеткізілген. Әйткенмен өңіріміздегі көптеген дәріханаларда бетперде тапшылығы сезілуде. Ал кейбір сауда-саттық жүргізетін интернет сайттарында медициналық бетперденің бір данасы 500 теңгеден 1500 теңгеге дейін сатылып жатыр. Осы орайда маскалардың өзімізде шығарылуы өңір тұрғындарын қорғаныш құралымен толық қамтамасыз етуге және қоғамда дүрбелең тумауына зор ықпал етеді. Ал алдағы екі аптаның ішінде бетперделер аймағымыздағы барлық тұрғындарға жеткілікті көлемде дайындалатын болады. Сұраныс жоғары болып тұрғандықтан, аталған кәсіпорындар бұл міндеттерді аз уақыт ішінде ойдағыдай орындап шығатындарына сенімді.
Әлібек КЕМЕЛХАН, «Семей таңы»{jcomments off}