Күн тақырыбына
Бүгінде еліміздің әр өңіріне Pfizer вакцинасы жеткізіліп, 12 жастан асқан балалар мен жүкті әйелдерге салынып жатқаны белгілі. Жалпы, әлемді жаулаған инфекцияға қарсы вакцина пайда болғаннан бері бірнеше миллион адам әр түрлі КВИ-ге қарсы вакцинамен егілді. Соның ішінде аталған екпе түрінің орны бөлек. Түрлі вакциналардың ішінде Дүниежүзілік денсаулық сақтау ұйымы 12 жастан 18 жасқа дейінгі балаларға, жүкті әйелдер мен бала емізетін аналарға салуға әзірге тек Pfizer вакцинасын ғана ұсынып отыр.
Қазіргі таңда Pfizer вакцинасын Семей қаласы бойынша 4744 бала мен жасөспірім, сонымен қатар 86 жүкті әйел және 338 бала емізетін ана алыпты. Бұл көрсеткіштер алдағы уақыттарда арта түсетіні белгілі.
Сонымен қатар жасөспірімдерді вакцинациялау қатаң түрде ата-анасының келісімдері арқылы ғана жүргізіліп жатқанын да айта кету ләзім. Бұл жайында аймақтық коммуникациялар қызметінде өткен брифингте Семей медициналық университетінің «Балалардың жұқпалы аурулары» мамандығы бойынша жоғарғы санатты дәрігері, медицина ғылымдарының кандидаты Анаргүл Мансұрова тарқатып айтып берді.
— Қаламызда қараша айынан бастап 12 жастан 18 жасқа дейінгі балалар мен жасөспірімдерді, сондай-ақ жүкті және емізетін әйелдерді вакцинациялау басталды. Жалпы, бір жастан 11 жасқа дейінгі балалар ауырғанда, статистика бойынша, вирусты жеңіл өткереді. 12 жастан 18 жасқа дейінгі балалар – жасөспірімдер, олар да коронавируспен ауырады және вирусты ересек адамдар сияқты өткереді. Егер осы ауру түрімен сырқаттанатын болса, асқынулары мен ауыр түрлері де орын алуы мүмкін. Бір жасқа дейінгі балаларға тоқталсақ, қазіргі таңда олар да жұқпалы сырқаттарды ауыр өткереді. Егер отбасында бір жасқа толмаған бала болса, онда отбасы мүшелері, үлкені бар, кішісі бар, барлығы бірдей вакцина алғандары жөн. Коронавирус инфекциясы әлі де жалғасуда, оның үстіне әрбір жаңа штамм ай өткен сайын мутациялануда. Пандемия қашан аяқталатыны белгісіз. Pfizer – балалар мен жасөспірімдерге арналған американдық вакцина, қазіргі уақытта ол Қазақстанда тіркелген және балаларға салуға рұқсат етілген бірегей шетелдік вакцина саналады. Ең бастысы, Pfizer вакцинасын әлемдік денсаулық сақтау ұйымы мақұлдаған. Дәл осы Pfizer компаниясында аталмыш вакцинаны балаларға қолдануға болатыны жайлы нақты әрі сенімді, ғылыми тұрғыда толық дәлелденген негіздемелер бар, — деп түсіндіріп өтті Анаргүл Мансұрова.
Сонымен қатар дәрігер жасөспірімдер мен ата-аналарды аталмыш екпеден еш күмәнданбауға шақырды. Себебі осыған дейін бірнеше мәрте клиникалық тексерулерден өтіп, бірқатар сараптама жасалынғандықтан, бұл шетелдік вакцина еш қауіпсіз деп танылған. Оның сапасы мен тиімділігіне өз кезегінде Дүниежүзілік денсаулық сақтау ұйымы кепілдік беріп отырғанын да айта кету керек.
А.Мансұрова айтып өткендей, екпенің жанама әсері бір күннен үш күнге дейін созылады екен. Көбінесе екінші дозасын алған соң қолдың ауыруы, әлсіздік, шаршау, ұйқышылдық сынды сезімдер болуы мүмкін. Жанама әсерлердің болғаны вакцинаның иммундық жүйеге оң әсер етіп жатқанын көрсетеді. Дей тұрғанмен жанама әсер болмауы да мүмкін, бірақ бұл — вакцина «жұмыс істемеді» дегенді білдірмейді. Клиникалық зерттеу барысында қатысушылардың жартысынан көбінде жанама әсерлер байқалмағанын айта кету керек. Сондай-ақ вакцинаның бірінші дозасын алғаннан кейін екінші дозасын міндетті түрде кем дегенде 21 күннен соң алу қажет болады екен.
Мұнымен қоса маман вакцинаның қауіпсіз екенін тағы бір мәрте атап өтіп, барша жасөсіпірімдерді, жүкті әйелдер мен бала емізетін аналарды екпе алуда белсенділік танытуға шақырып, мықты денсаулық тіледі.
Әлібек КЕМЕЛХАН,
«Семей таңы»