Семей қаласында 60 балабақша, 57 және 9 шағын орталық халықтың әлеуметтік қорғалмаған топтарындағы балаларды қабылдап, оларды тегін ыстық тамақпен қамтамасыз етеді. Әр айдың қорытындысы бойынша, тегін тамақ берілетін балалардың саны туралы ақпаратты әрбір балабақша мен шағын орталық қалалық білім бөліміне ұсынады. Төлемдер барлық құжаттарды тексергеннен кейін жасалады.
— Менің жеке парақшама қала тұрғындары төлемдердің жекелеген кідірістері туралы мәселені нақтылауды сұрайды. Жуырда орын алған тәртіпсіздік пен төтенше жағдайға байланысты жеке балабақшалар бойынша желтоқсан айының құжаттары қалалық білім бөліміне түспеді. Демек олар өңделмеді және дерекқорға енгізілмеді. Осыған байланысты, көпбалалы отбасылар алдында 1 миллион 750 мың теңге мөлшерінде қарыз пайда болды. Білім бөліміне осы қарызды өтеу бойынша барлық шараларды қабылдауды тапсырамын, — деді қала әкімі Бақытжан Байахметов арнайы өткізілген кеңесте.
Білім бөлімінің мәліметіне сәйкес, қаңтар айының бюджетінде 7 миллион 250 мың теңге төлем сомасы жоспарланған. Бұған желтоқсан айындағы қарызды өтеу үшін қарастырылған ақша да кіреді.
Әдетте, балабақшалар мен шағын орталықтарда тегін тамақтану үшін құжаттарды жинау 10 қаңтарға дейін жүргізілетін. Енді белгілі себептерге және төтенше жағдай режиміне байланысты бұл мерзім 20 қаңтарға дейін ұзартылды.
Семей қаласында 60 балабақша (15 мемлекеттік, 45 жеке меншік) және 21 мектеп жанындағы шағын орталық жұмыс істейді. Оларда 11257 бала тәрбиеленіп жатыр. Өткен жылы 1378 бала тегін тамақпен қамтамасыз етілді. 3 жасқа дейінгі балалар үшін ата-ананың ақы төлеу мөлшері 12400 теңгені, 3 жастан бастап 12500 теңгені құрайды.
Төлемдер жетім балаларға, ата-анасының қамқорлығынсыз қалған балаларға; даму мүмкіндіктері шектеулі, мүгедек балаларға; көп балалы отбасылардан шыққан балаларға; атаулы әлеуметтік көмек алуға құқығы бар отбасылардан шыққан, сондай-ақ, атаулы әлеуметтік көмек алмайтын, жан басына шаққандағы табысы ең төменгі күнкөріс деңгейінен төмен отбасылардың балаларына беріледі.
Семей қалалық білім бөлімі
