Бүгінде қаңтардың 5-6-ы күндері орын алған бүліктің салдарынан дүние-мүлкіне зақым келіп, зардап шеккен шағын және орта бизнес өкілдеріне қолдау көрсету шаралары басталып кетті. Осы орайда ШҚО кәсіпкерлер палатасының Семей қаласындағы филиалы жаппай тәртіпсіздік кезінде зардап шеккен кәсіпкерлерге өтемақы алуға көмек бермек.
ШҚО кәсіпкерлер палатасы Семей филиалының директоры Әлия Жүрсімбаеваның мәліметінше, қазіргі күні екі жеке кәсіпкер келтірілген шығындарды өтеу туралы өтініш берген. 7 қаңтар күні аталған филиалға Восточный кентінде орналасқан шағын қонақ үйдің иесі өтінішпен жүгінген. Оның айтуынша, бұзақылар ғимараттың терезелерін, кіреберіс және ішкі есіктерін, іштегі жиһаздарды сындырып, қолдарына ілінгеннің бәрін алып кеткен.
Ал 10 қаңтар күні, яғни апта басында қалалық әкімдік ғимаратында орналасқан асхананы жалға алушылар қоңырау шалған. Осы шағын кәсіпкерлік нысаны Семейде ең көп зардап шеккендердің бірі болып отыр. Бүлікшілер бүкіл ғимаратты еркін аралап, жылынып, асханадан тамақтанған. Қазіргі таңда кәсіпкерлердің шығындары есептеліп жатыр.
Семей кәсіпкерлері облыс орталығындағы тәртіпсіздік кезінде де шығынға ұшыраған көрінеді. Мәселен, қаланың отандық тауар өндірушілерінің бірі айтып өткендей, олардың Өскеменге сүт және шұжық өнімдерін жеткізген «Газель» автокөлігіне Назарбаев даңғылында белгісіз бір топ адамдар тас лақтырып, машинаның металл корпусын, әйнектерін сындырып кеткен.
— ШҚО кәсіпкерлер палатасының Семей филиалы осы кезеңде зардап шеккен бизнес өкілдерінен ақпарат жинауда. Кәсіпкерлер өтінімінде террористік шабуыл нәтижесінде зақым келген объектінің бейне және фотофиксациясын, жөндеу үшін қажет болатын материалдардың бағасы бар прайс-парақ қоса берілуі керек. Жиналған құжаттар мен материалдар пакеті қалалық әкімдікке тапсырылады, — деп түсіндірді Әлия Жүрсімбаева.
Зардап шеккен бизнес өкілдерінен өтінімдер әлі де жиналып жатыр.
«СТ» — ақпарат
