Мұхтар Әуезовтің туғанына 125 жыл
Өткен аптада, Нұр-Сұлтан қаласында Абайдың «Жидебай – Бөрілі» мемлекеттік музей-қорығында ғұлама ғалым, кемеңгер жазушы Мұхтар Әуезовтің 125 жылдығына арналған «Қазақты әлемге танытқан Әуезов әлемі» көрмесі ашылды.
Елордадағы № 86 жалпы білім беретін мектепке Мұхтар Әуезов есімінің берілуіне орай өткізілген шараға астанадағы зиялы қауым өкілдері, ұстаздар мен оқушылар қатысты. Салтанатты шарада сөз алған философ-әдебиеттанушы, Абай музейінің директоры Тұрдықұл Шаңбай М.Әуезов есімі беріліп отырған мекеме ұжымын құттықтап, мектеп директоры Базаргүл Сағындыққызына Абай медалін табыс етті.
Өз кезегінде мектеп басшысы Б.Сыздықова Мұхтар мұрасын насихаттаудағы елеулі еңбегі үшін, музей директоры Т.Шаңбайды Мұхтар Әуезов медалімен марапаттады.
Жазушының кіндік қаны тамған Бөрілідегі Мұхтар Әуезов музей-үйінің меңгерушісі Шағжан Исабаев Абай музейі қорындағы және жазушының музей-үйіндегі Мұхтар Әуезовке қатысты бағалы әрі құнды жәдігерлерді көпшілікке таныстырды.
Аталған көрмеге арнайы жеткізілген жазушы бейнесі сомдалған кілемше, Мұхтар Омарханұлының киген киімі, ағайын-туыстарына жазған хаттары мен фотосуреттері, жазушының қолтаңбасымен музей қорына тапсырылған жәдігерлер жиылған көпшіліктің қызығушылығын тудырды.
Қуат ҚАЗЕЗҰЛЫ,
Абай музейінің ғылыми қызметкері
