Ресей аумағында диверсия әрекеттері жалғаса берсе, Ресей Украинаның шешім шығару орталықтарына соққы жасайды. Бұл туралы Ресей Қорғаныс министрлігінің баспасөз хатшысы генерал-майор Игорь Конашенков айтты, – деп хабарлайды SemeyTany.kz тілшісі Tengrinews.kz сайтына сілтеме жасап.
«Біз украин әскері Ресей Федерациясының аумағындағы объектілерге диверсия жасау әрекеттері мен соққыларын көріп отырмыз. Егер мұндай жағдайлар жалғаса берсе, РФ Қарулы күштері шешім шығару орталықтарына, соның ішінде Киевке де соққы жасайды. Ресей әскері бұған дейін мұндай әрекетке бармаған», – деді Конашенков.
Бұған дейін Ресей президенті Владимир Путин беларусьтік әріптесі Александр Лукашенкомен бірге «Восточный» ғарыш айлағына сапарында Украинадағы арнайы әскери операция жоспарға сай жүріп жатқанын және оның «түсінікті әрі асыл» мақсаттары орындалатынын, ал Ресей экономикасы Батыс санкцияларына төтеп беріп жатқанын айтқан еді.
АҚШ президенті Джо Байден Украина басшысы Владимир Зеленскиймен телефон арқылы сөйлесіп, Киевке жаңа әскери көмек беретінін айтты, – деп хабарлайды SemeyTany.kz тілшісі Tengrinews.kz сайтына сілтеме жасап.
АҚШ басшысының сөзінше, Вашингтон «қару-жарақ, оқ-дәрі және Украинаның қауіпсіздік саласына басқа да көмек түрінде» қосымша 800 миллион доллар бөледі.
Байден АҚШ Киевке жаңа көмек аясында бұрыннан жеткізіліп жүрген қару-жарақ пен әскери техникадан бөлек, бронтранспортерлерді, артиллериялық жүйелер мен снарядтарды қоса алғанда «жаңа құралдарды» жіберуге ниетті екенін айтты.
«Мен қосымша тікұшақтардың берілуін де мақұлдадым», – деді Байден.
Оның айтуынша, қару-жарақ жеткізуден басқа, Америка Құрама Штаттары одақтастармен Украинаға айтарлықтай әскери көмек көрсетуге келісті.
Бұған дейін АҚШ Украинаға 300 миллион доллар көлемінде қосымша әскери көмек берген болатын.
БІЗДІ ӘЛЕУМЕТТІК ЖЕЛІЛЕРДЕН ОҚЫҢЫЗ!
