Semeytany.kz — Израиль қарулы күштері Газа қаласына бағытталған жаңа операциясын бастады. Әуеден соққылар жасалып, танк бөлімшелері қала шетіне енгізілді. Әскери-қимылдардың мақсаты – Газаға бақылау орнату және ХАМАС ықпалын әлсірету деп мәлімделді.
Израиль Қорғаныс күштері штабының басшысы Эйял Замир мен қауіпсіздік құрылымдарының жетекшілері премьер-министр Беньямин Нетаньяхуға операцияның тәуекелдерін ескертіп, одан бас тартуға кеңес берген. Олардың айтуынша, шабуыл қалада кепілге алынған израильдіктердің өміріне қауіп төндіруі, Тель-Авивті анклавқа әскери әкімдік орнатуға итермелеуі және ХАМАС-ты түбегейлі жоюға жеткізбеуі мүмкін. Осыған байланысты Нетаньяху резиденциясы маңында наразылық акциялары өтіп, белсенділер шатырлар тіккен.
21 тамызда премьер-министр Газа қаласын бақылауға алу және ХАМАС-ты жеңу жоспарын бекіткен. Келесі күні әскерлер маневрге кірісті. «Галей Цахал» армия радиосының дерегінше, операция 2026 жылға дейін созылуы ықтимал, ал ең қызған кезеңде 130 мыңға дейін резервші жұмылдырылады. Бұған дейін үкімет анклавтың бүкіл аумағында «қауіпсіздік периметрін» қамтамасыз ету ниетін айтып, кейін оны азаматтық басқаруға беруді жоспарлайтынын хабарлаған. Израильдің бұл жоспарын Мысыр мен Катар секілді бірқатар мемлекеттер айыптады.
Газа – тығыз қоныстанған палестиналық анклав. Соңғы айларда бұл өңірде қақтығыс ушығып, электр, су, гуманитарлық жеткізілімдерге шектеулер қойылғаны хабарланған. Қазіргі сәтте ұрыс қимылдары жалғасуда, жағдай шиеленіскен күйінде қалып отыр.
