МЕДИЦИНА САЛАСЫН ДАМЫТУ БАСТЫ НАЗАРДА
Бүгінгі таңда Шығыс Қазақстан облысында қоғамдық денсаулық сақтау мәселесіне ерекше көңіл бөлініп отырғаны белгілі. Коронавирус пандемиясы жағдайында денсаулық сақтау жүйесінің тиімділігін арттыру мәселелері біздің облысымыз бойынша да өзекті тақырыпқа айналған болатын.
Соңғы бес жылда облыс бойынша жоғары технологиялық медициналық техника көлемі 2,5 есе өсті, 35,6 млрд теңгеге халықаралық стандарттарға сәйкес келетін үш мыңнан астам заманауи жабдық сатылып алынды.
Облыс орталығындағы №1 қалалық аурухана базасында роботохирургия және трансплантология орталығы ашылды, маммология және гинекология реанимациясы бөлімшесінің операциялық блогы жаңғыртылды. Сәулелік терапия үшін компьютерлік томограф және жүйелік үдеткіш сатып алынды. Облыстық аурухана мен мамандандырылған медициналық орталық үшін рентген аппараттары алынды.
Оған қоса, елімізде баламасы жоқ гематология орталығының құрылысы жүргізілуде. Аталған нысанның бірегейлігі жасушалық және гендік-инженерлік технологияларды пайдалануында екен. Сонымен қатар алдағы уақытта екі емхана мен халық арасында беделге ие «Олимп» зертханасының жаңа корпустарын ашу шаралары да жоспарлануда.
Облыс әкімі Даниал Ахметовтің қолдауымен Семей өңіріндегі денсаулық сақтау саласына да ерекше көңіл бөлінуде. Соңғы бес жылда салаға 8,3 млрд теңге инвестиция салынды, халықаралық стандарттарға сәйкес келетін 300-ге жуық заманауи жабдық сатылып алынды. Медициналық ұйымдардың жабдықтармен жабдықталуы 87,5 пайызды құрады. Соңғы жылдары жедел жәрдем автокөліктерінің паркі 91 бірлікке жаңартылды. Бірегей Ядролық медицина орталығы іске қосылды. Радионуклидтік терапия бөлімшесі үздік әлемдік тәжірибе деңгейіне сәйкес келеді. Бүгінгі таңда 217 пациент емделіп, 446 пациент диагностикалық тексеруден өтті. Ал перинаталдық орталық базасында балаларды оңалту және катамнез орталығы ашылды. Соңғы үш жылда жетекші шетелдік клиникаларда семейлік 74 медицина қызметкері оқытылыпты.
Жалпы, облыстағы денсаулық сақтау саласын жетілдіру мақсатында атқарылып жатқан жоспарлы жұмыстарды аймақ басшысы Даниал Кенжетайұлы өз назарында ұстап отыр.
Азамат ЕРСАЙЫН
БІЗДІ ӘЛЕУМЕТТІК ЖЕЛІЛЕРДЕН ОҚЫҢЫЗ!
