Ағымдағы жылы Шығыс Қазақстан облысында биыл облыстық және аудандық маңызы бар жолдарды жөндеуге 11 млрд теңге жұмылдырылды.
Бұл жайлы жуырда Семейдегі Ақпарат орталығында өткен баспасөз мәслихаты барысында ШҚО Жолаушылар көлігі және автомобиль жолдары басқармасы басшысының міндетін атқарушы Нұрбек Тұраров мәлім етті.
— Өңір бойынша осы жылы жол жөндеуге қатысты 122 жобаны іске асыру жоспарланып отыр. Семейдегі көлік көпірін қайта жаңғырту жұмыстары басталады. Жоба құны 30 млрд теңгеден асады. Құрылысты бастауға республикалық бюджеттен 1 млрд теңге бөлінді. Өскеменде трамвай жолдарын жаңғырту, Белинский, Карбышев, Базовая көшелерін жаңғырту көзделуде, — деді Нұрбек Тұраров.
Сөз орайында айта кетер бір жайт, Белоусовка ауылында екі көпірдің құрылысы басталған. Бұдан бөлек, былтырдан бері Риддер қаласындағы Филипповка мен Үлбі өзендері арқылы өтетін көпірлердің құрылысы жүргізіліп жатыр. Аталмыш жобаны биыл аяқтау көзделген, оны жүзеге асыруға 37,5 миллион теңге қаржы бөлінген.
Жалпы, бүгінгі таңда облысымыз бойынша шекаралық аудандарда жолдар мен көшелерді орташа жөндеу бойынша 37 жоба іске асырылады. Жекелей тоқталар болсақ, Катонқарағай ауданында – 7, Күршім ауданында –2, Тарбағатай ауданында – 9, Үржар ауданында – 8, Бородулиха ауданында – 5, Шемонаиха ауданында 6 жоба қолға алынған.
Естеріңізге сала кетсек, осыған дейін ШҚО әкімі Даниал Ахметов шекаралық аудандарды дамытуға ерекше назар аударылып, қарқынды жұмыс жүргізілетінін, қордаланған мәселелерді шешуге күш салынатынын айтқан болатын.
Азамат ЕРСАЙЫН,
«Семей таңы»
