ПАРТИЯНЫҢ МОБИЛЬДІК ТОПТАРЫ АУЫЛДАРДА
AMANAT партиясын қайта жаңғырту бағдарламасы аясында бірқатар бастамалар сәтті іске асырылуда. Ауыл-аймақтағы ағайынның мұң-мұқтажын тыңдау мақсатында қолға алынған партияның мобильді қоғамдық қабылдауы 14 наурыздан бері жұмыс істеуде.
Жуырда Шығыс Қазақстан облысына AMANAT партиясының республикалық мобильді қоғамдық қабылдау тобы келіп, Алтай және Катонқарағай аудандарының тұрғындарымен кездесті. Оған облыстық партия филиалының басшылығы, облыстық мәслихат депутаттары мен бірқатар облыстық басқармалардың басшылары қатысты.
Әуелі олар Алтай ауданына қарасты Полянское ауылына, одан кейін Катонқарағай ауданындағы Малонарымка ауылына барды. Қоғамдық қабылдауға аталған екі ауылдық округтің тұрғындары ғана емес, көршілес Тұрғысын, Алтынбел ауылдарынан да азаматтар келді. Қабылдауларға 30-дан астам азамат келіп, өздерін алаңдатқан мәселелеріне қатысты сұрақтарын қойды. Осы күні мобильді топ сондай-ақ Жарма ауданының Жаңғызтөбе, Белтерек, Бесқарағай ауданының Қарағайлы ауылдарында да тұрғындарды қабылдады.
Қабылдауларда тұрғындардың басым бөлігі ауыз су мен ауыл ішіндегі жол құрылысы, көшелерді жарықтандыру, ұялы байланыс пен интернет сапасы, тұрғын үй-коммуналдық шаруашылық, жұмыссыздық және әлеуметтік мәселелерді көтерді. Мәселен, Алтай ауданы Полянское ауылдық округінің тұрғыны А.Д.Шишкунов ауылдағы байланыс сапасының, интернет жылдамдығының өте төмен екендігін жеткізді.
– Ұялы байланыс, интернет мәселесі бүгінгі қоғамдық өмірдің офлайннан онлайнға ауысқан тұсында білінуде. Әлемді жайлаған коронавирус кезінде өте қатты сезілді. Балаларымыз онлайн сабақ оқығанда қиындықтар туындады. Осы мәселенің шешілуіне ықпал етсеңіздер екен. Мәселе шешіледі деп сенім артамыз, – деді өтініш иесі.
Партияның мобильді қоғамдық қабылдау тобы бұған дейін де еліміздің бірнеше облыстарында болып, халықтың арыз-шағымдарын тыңдап қайтқан. Ал партияның Шығыс Қазақстан облыстық филиалы мобильді қабылдауларын Шемонаиха, Глубокое, және Ұлан аудандарында өткізді. 6 ауылдық округ қамтылған қабылдауларға 150-ден астам азамат келіп, өз өтініштерін білдірген.
– Осыған дейін Республикалық қоғамдық қабылдау бөлмесі 179-ға жуық қабылдау өткізіп, оған 2200-ден астам азаматтар келді. 1 айға жетпей, өтініштердің 21%-ы оң шешімін тапты. Бүгін Шығыс Қазақстан облысының Алтай ауданы Полянское ауылына, Катонқарағай ауданы Малонарымка ауылына келіп, мобильді қоғамдық қабылдау өткіздік. Шығыс Қазақстан облысының басқарма басшылары, партияның депутаттық фракция мүшелері қатысып, азаматтарды қабылдады. Полянское ауылын сараптайтын болсақ, көп көтерілген мәселе ауыз су және жол жөндеу жайлы болды. Атап айтқанда: Алтай – Рахман қайнары автомобиль жолын жөндеу, ауыл ішіндегі Киров көшесінің жолын ретке келтіру, ауыз суға арналған резерв құрылғысын, сумен жабдықтау жүйесіне арналған сорғыны жөндеу. Тұрғындар тарапынан түскен сұрақтар жинақталып, Республикалық қоғамдық қабылдау бөлмесі арқылы Министрлікке хат жол данады. Әр мәселеге тиянақты жауап беруін қадағалаймыз, – дейді Республикалық қоғамдық қабылдау бөлімінің кеңесшісі Аралбай Ардан Сұлтанұлы.
Партияның Шығыс Қазақстан облыстық филиалының атқарушы хатшысының м.а. Айгүл Байжанованың айтуынша, өңірлік филиалдың қабылдау бөлмелеріне биылғы жылы 11 000-нан астам өтініш келіп түскен. Өтініштердің 41 %-ы оң шешілген. Ал биылғы жылдың үш айында 3000-ға жуық шағым қабылданып, оның 38 %-ы оңтайлы шешімін тапқан.
Жалпы, AMANAT партиясының қоғамдық қабылдауларына түйткілді мәселелерін айтып, көмек сұрап келетін азаматтар өте көп. Партияның қоғамдық қабылдау бөлмелері тұрғындар үшін өздерін толғандырған сұрақтарына жауап табатын бірден-бір тиімді алаңға айналып отыр.
AMANAT партиясы ШҚО филиалы
