Бүгінгі таңда Шығыс Қазақстан облысы бойынша бірде-бір жағажай шомылу маусымына дайын емес. ШҚО Төтенше жағдайлар департаменті баспасөз қызметінің мәліметіне сүйенсек, жаздың алғашқы айында, яғни алдағы маусым айында облыс аумағында суға түсу маусымы басталады.
Алайда әлі күнге дейін бірде-бір жағажай маусымға дайын болмай тұр. Бүгінде құтқарушылар қалалардағы су айдындарының түбіне барлау жұмыстарын жүргізіп жатыр.
«Облыста халық тығыз орналасқан жерлерде екі мыңнан астам су қоймасы бар. Шомылу орындарының талапқа сай келмеуі судағы жазатайым оқиғалардың негізгі себебі екендігі белгілі. Өткен суға түсу маусымында 35 адам, оның ішінде он бала суға кетті», — делінген Департамент таратқан ақпаратта.
Шығыс Қазақстан облысы әкімдігінің қаулысына сәйкес, аймақ бойынша жабдықталған 16 учаске бар. Оның бесеуі Өскемен қаласында орналасқан. Сонымен қатар құтқарушылар судағы қайғылы жағдайлардың алдын алу мақсатында жағажайларды қайықпен патрульдеуде. Барлығы 1503 рейд ұйымдастырылып, тұрғындар арасында (11 274 адам) түсіндіру жұмыстары жүргізілген. Естеріңізге сала кетсек, осыған дейін ШҚО-да сел және лай көшкіні қаупі бар кезең басталғанын хабарлаған едік.
«СТ» — ақпарат