Аймақ басшысы Даниал Ахметов көп балалы аналар комиссиясымен кеңес өткізді. Кеңесте 12 жастан 18 жасқа дейінгі балаларды вакцинациялау, оқушылардың жазғы демалысын ұйымдастыру, көп балалы отбасыларды қолдау бағдарламасының жүзеге асырылуы ды мәселелер талқыланды.
Жалпы, аймағымызда 12 жастан 18 жасқа дейінгі балаларды Pfizer препаратымен вакцинациялау шаралары қарқынды жүргізілуде. Екпенің бірінші компонентін оқушылардың жүз пайызы, екіншісін 99 пайызы салдырған. Маусым айының соңына дейін вакцинациялау аяқталады.
Оқушылардың жазғы демалысын ұйымдастыру мәселесіне келсек, өткен оқу жылында пандемияға байланысты жазғы демалысты толық ұйымдастыруға мүмкіндік болмағаны белгілі. Сондықтан биыл лагерьлер саны көбірек болады. Жазғы демалыста барлығы 35 қала сыртындағы және 475 мектеп жанындағы лагерьлер жұмыс істейтін болады. Және 500-ге жуық алаң, тілдік мектептер, IT-бағыттар және т.б. ұйымдастырылады.
Лагерьлерге бірінші кезекте аз қамтылған, көп балалы отбасылардың балалары жіберіледі. Облыс әкімінің айтуынша, көп балалы және аз қамтылған отбасылардан шыққан 44 мың бала лагерьлерде демалатын болады.
Аймақ басшысы біздің өңір жалпыға міндетті оқытуды ұйымдастыруға елдегі ең үлкен қаржыландыруды бөліп отырғанын атап өтті.
Жиында Үржар, Күршім және Тарбағатай аудандары әкімдерінің есептері тыңдалды. Аталған аудандарда көп балалы отбасыларды қолдау бағдарламасы өте жақсы жүзеге асырылуда. Биыл ауылдық жерлерге көбірек көңіл бөлінетін болады.
– Отбасылар қосалқы шаруашылықпен айналысып, бизнесін дамыту үшін үй салып қана қоймай, несие беру керек. Мұндай жобалар АӘК алушылар санын 18 мыңнан жеті мың отбасына дейін төмендетуге мүмкіндік берді. Түрлі бағдарламалардың арқасында көп балалы және аз қамтылған аналар үшін жұмыс орындары құрылып, олар бизнес ашты. Жалпы, көп балалы аналар комиссиясы өте жақсы жұмыс істейді және барлық жобаларға белсенді қатысады,- деп түйіндеді сөзін облыс әкімі.
