Семей қаласында Балаларды қорғау күні барынша мерекелік сән-салтанатпен тойланды.
Негізгі мереке Ертіс өзенінің жағасында әдемі әуен аясында өтті. Мұнда балалар мен ата-аналар, қаладағы түрлі шығармашылық ұжымдары жиналған болатын.
Балаларды құттықтауға қала басшылығы да арнайы келді. Көпшілік алдында Семей қаласының әкімі Бақытжан Байахметов сөз алып, балаларға жылы лебізін білдірді.
— Құрметті кішкентай достар! Бүгін Халықаралық балаларды қорғау күні. Сіздерді шын жүректен құттықтаймын! Балаларымызға амандық тілеймін, олар әрқашан күлімдеп жүрсін, мерекелер балалық күлкіге ұлассын. Біз әрдайым балалар үшін алаңдаймыз, оларға жақсы тәрбие мен білім беруге ұмтыламыз. Жақында мен халықаралық, республикалық олимпиадалардың жеңімпаздары атанған дарынды балалармен кездестім. Балалар — Жаңа Қазақстанның болашағы, — деді қала әкімі.
– Биылғы жыл Мемлекет басшысының Жарлығымен Балалар жылы болып жарияланды, бұл еліміздің, облысымыздың қалыптасуы жолындағы үлкен бастама деп санаймын. Ең маңызды инвестиция – адам әлеуетін дамытуға үлес қосу. Елімізді әлемнің дамыған елдерінің қатарына жеткізетін — болашақтағы біздің әлеуетіміз – балалар, — деп ізгі тілегін жеткізді әкім.
Бұл күні балақайлар үшін жағалауда 11 нысан жұмыс істеді. Концерттен басқа, көрме ұйымдастырылып, эстафета, асфальтқа сурет салу байқауы өтті және Биологиялық орталық пен Достық үйінің жанында, қалалық кітапханалар мен Абай театрында да балаларға арналып бірқатар мерекелік шаралар ұйымдастырылады.
Анар АМЕТҚАЛИЕВА,
«Семей таңы»
