Дәрігер — қоғамға аса қажетті, қастерлі мамандық. Бұл кәсіптің жауапкершілігі мол, қызығы мен шыжығы да жеткілікті. Әсіресе балалар дәрігеріне екі есе жауапкершілік жүктеледі. Бала десе ішкен асын жерге қоятын халқымыз үшін сәбидің денсаулығы бәрінен қымбат. Елімізде бала дәрігері деген қастерлі мамандыққа өмірін арнап жүрген ақ халатты абзал жандар аз емес. Солардың бірі — бүлдіршіндерге медициналық көмек көрсетудің сапасын арттыруға барынша үлес қосып жүрген білікті маман Күнсая Болатқызы Нұрғалиева. Үржар ауданының Шолпан ауылындағы Жүзағаш орта мектебін бітірген. Семей медицина университетінде оқып, балалар дәрігері мамандығын алып шыққан Күнсая — қазір Ақсуатта аудандық педиатр.
— Сырқаттанған әр балаға мейірім төге қарап, ыждағаттылықпен емдеп, қажет кезінде күн демей, түн демей қызмет орнынан табылатын Күнсая қарапайым мінезімен, адалдығымен, еңбексүйгіштігімен көптің құрметіне бөленуде,- дейді аудандық аурухананың бас дәрігері Алмагүл Әштаева.
Күнсаяның Ақсуатқа келін болып түскеніне көп жыл болды. Ақсуаттың Алмас деген азаматымен көңіл жарастырып, отау құрып, ұл өсіріп, қыз тәрбиеледі. Алмас — жеке кәсіпкер. Олардың шаңырағында бір ұл, бір қыз азамат болып өсіп келеді. Қыздары Сандуғаш Еуразия ұлттық университетін қаржыгер мамандығы бойынша бітіргелі отырса, ұлдары Нұрислам дәрігер болуды мақсат еткен екен. Қазір елорданың медициналық университетінің студенті.
Медицина қызметкерлері мерекесі қарсаңында өзінің кәсіби біліктілігін жетілдіру үшін үздіксіз ізденіп, көп оқып, бiлiм мен еңбекқорлықты ұштастыра бiлген ақ халатты абзал жанды әңгімеге тартып, мамандығы жайлы сұраған едік.
— Менің нағашы атамның аты да әкемнің есімі сияқты Болат еді. Сол нағашы атам бала кезімде мені өте жақсы көрді. Ол кісі көп ауыратын. «Осы қызымды дәрігер етіп шығарамын, мені емдейді»,- деп отыратын. Мамандық таңдауыма сол нағашы атамның сөзі әсер етті. Бірақ менің таңдауым балалар дәрігері мамандығы болды. Балалар дәрігері болу оңай емес. Сәби қай жері ауырып тұрғанын айтпайды, жылайды, мазасызданады. Сондықтан күні-түні қасында боламыз. Алғаш жұмысқа кіріскенде осындағы Бақыт Әбдікенова, Фируза Мариева, Ардақ Тұрарова сынды дәрігер әпкелеріміз ақыл-кеңестерін аямады, тәжірибелерін үйретті, көмектесті, ол кісілерге алғысым шексіз.
Қазір ана мен балаға деген мемлекет қамқорлығы жақсара түскен. Мемлекетіміз медицинаға, оның ішінде балалар медицинасына барынша жағдай жасап отыр. Заман талаптарына сай жабдықтар әкелініп жатыр. Ауданымызда өмірге келген сәбилер тегіс аман, аналарының қамқорлығында. Биыл жыл басынан бері Ақсуатта 154 сәби дүиеге келді. Дәрі-дәрмек жеткілікті.
Біздің аудандық аурухана дәрігерлерінің кәсіби шеберлігі жоғары. Бас дәрігеріміз Алмагүл Әштаева, Қарлығаш Көшкімбаева, Айгүл Тұрғанбаева, Әсел Абылғазина, Оралхан Ахметжанова, Мекай Молдекин, Бағдан Оразханов — бәрі де өз істерінің нағыз шеберлері. Мен береке-бірлігі жарасқан ұжымда, білімді де білікті дәрігерлермен қызметтес болғанымды мақтан етемін,- дейді Күнсая Болатқызы.
Күнсая Болатқызы Шығыс Қазақстан облысы және аудан әкімінің алғыс хаттарымен марапатталған. Былтыр «Тарбағатай ауданының әлеуметтік-экономикалық дамуына сіңірген еңбегі үшін» төсбелгісін кеудесіне тақты.
Басты байлығымыз бала денсаулығын қорғау жолында тынымсыз еңбек етіп жүрген Күнсая Болатқызын төл мерекесімен құттықтап, мықты денсаулық, еңбегіне табыс тілейміз!
Хамза СӘТИЕВ,
«Семей таңы»
