Кеше, 28 маусым – Бұқаралық ақпарат құралдары қызметкерлері күніне орай,
Абай облысының әкімі Нұрлан Ұранхаев өңірлік бұқаралық ақпарат құралдары өкілдерімен кездесіп, кәсіби мерекелерімен құттықтады.
Облыс басшысы журналистердің шығармашылық еңбектеріне табыс тілеп, үздік БАҚ өкілдеріне марапаттар табыс етті.
«ABAI AIMAQ MEDIA» ЖШС директоры Риза Асанқызы Молдашева бұқаралық ақпарат құралдарына облыстың әлеуметтік-экономикалық және рухани-мәдени дамуын объективті түрде көрсетіп, аймақтың қоғамдық өміріне белсене қатысқаны үшін Құрмет грамотасымен марапатталды.
Бақ өкілдерін сонымен қатар Шығыс Қазақстан облысының әкімдігі мен Семей қаласының әкімі Бақытжан Байахметов те құттықтады.
Өңір журналистикасының дамуына қосқан үлесі үшін және баспаның 105 жылдығына орай, «Семей таңы» газетінің редакциясына алғыс жарияланды.
Кəсіби мереке қарсаңында берілетін Шығыс Қазақстан облысы əкімінің сыйлығымен биыл 11 номинация бойынша ақпарат құралдарының өкілдері марапатталды. Олардың қатарында «Семей таңы» газетінің тілшісі Әйгерім Сәрсенқалиқызы да бар.
Кәсіби мерекеге орай қала әкімі Бақытжан Байахметов жемісті еңбек етіп жүрген бірқатар БАҚ қызметкерлерін «Қалаға сіңірген еңбегі үшін» төсбелгісімен, Құрмет грамотасымен және алғыс хатпен марапаттады.
Әріптестеріміз — «Семей таңы» газетінің аға тілшісі Қуаныш Қожаев, «Вести Семей» газетінің редакторы Шынар Рысакова Құрмет грамотасымен, басылымның дизайнер-бет қаттаушылары — Торгын Акимжанова мен Елена Коробова алғыс хатпен марапатталды.
Марапатқа ие болған барлық әріптестерімізді құттықтап, шығармашылық табыстар тілейміз!
«СТ» — ақпарат
