Қазақстан коронавирус бойынша «сары» аймаққа өтсе, Үкімет қандай шараларды қолға алады? Бұл туралы Премьер-Министрдің орынбасары Тоғжановтың төрағалығымен Қазақстан аумағында коронавирус инфекциясы таралуының алдын алу жөніндегі ведомствоаралық комиссияның отырысында айтылды.
Денсаулық сақтау министрі Ажар Ғинияттың айтуынша, елімізде маусым айының ортасынан бастап коронавирус жұқтырғандар саны артқан. Өткен аптамен салыстырғанда вирус жұқтыру жағдайлары 2,9 есе артқан, науқастардың 80 пайызына жуығы – індетке қарсы екпе алмағандар және соңғы екпеден кейін 6 ай өтіп кеткен адамдар.
Қазақстан «сары» аймаққа өткен жағдайда, науқаспен тығыз қарым-қатынаста болғандарды қашықтан жұмыс істеу форматына көшіру; COVID-19-ға қарсы екпе салдыруға болмайтын қызметкерлер мен жүкті әйелдерді қашықтан жұмыс істеу форматына ауыстыру; жабық жерлер мен қоғамдық көлікте міндетті түрде маска тағу; 10-нан астам адам қатысатын жиналыстарды онлайн форматта өткізуді ұсыну шаралары қабылданады.
Сондай-ақ аймақтың эпидемиологиялық ахуалына қарамастан, әуеде, ТЖ көліктері мен халықаралық автобустарда маска тағу ұсынылады.
Айта кетейік, өткен сенбіде Қазақстанда 158 адамның коронавирус инфекциясына шалдыққаны анықталды. Ең көбі Алматы және Нұр-Сұлтан қалаларының тұрғындары болып отыр. Ал бір күн бұрын еліміз бойынша Covid инфекциясын жұқтырған 188 науқас тіркелген болатын.
Ақтөбе, Жамбыл, Қызылорда, Маңғыстау, Түркістан облыстарында коронавирус анықталған жоқ.
«СТ» — ақпарат
