Абай гарнизонындағы 28738 әскери бөлімінде жауынгерлік даярлық жоспарына сәйкес мамандық бойынша дайындық сабақтары үздіксіз жүргізілуде. Дайындық барысында әрбір әскери қызметші өз әскери мамандығына сәйкес заманауи қару-жарақ пен арнайы техниканы меңгеріп, кәсіби шеберлігін арттыруда.
Мамандық бойынша даярлықтан өтіп жатқан сарбаздардың бірі – мерзімді әскери қызметші, барлаушы, кіші сержант Өмірзақ Бақдәулет. Ол артиллериялық барлаушылардың негізгі құралдарының бірі саналатын телескоптық артиллериялық буссольмен жұмыс істеу тәсілдерін теориялық және тәжірибелік тұрғыда меңгеруде.
Бұл арнайы құрылғы қарсыластың нақты орналасқан орнын, бағыттары мен координаттарын анықтауға мүмкіндік береді. Алынған мәліметтер артиллериялық бөлімшелерге дәл әрі нәтижелі атыс жүргізу үшін жеткізіледі. Сондықтан артиллериялық барлаушының кәсіби дайындығы мен дәлдігі жауынгерлік тапсырмалардың сәтті орындалуында ерекше маңызға ие.
– Арнайы құрылғы арқылы нормативтерді орындап, мамандық бойынша күнделікті дайындық сабақтарын өткіземіз. Әр жаттығу біздің тәжірибемізді арттырып, жауынгерлік шеберлігімізді шыңдайды. Біз кез келген уақытта жауынгерлік тапсырманы орындауға және атысқа дайынбыз, – дейді кіші сержант Өмірзақ Бақдәулет.
Мамандық бойынша дайындық сабақтары әскери қызметшілердің кәсіби деңгейін арттырып қана қоймай, олардың өзара үйлесімді әрекет етуіне, жауынгерлік жағдайда жедел әрі дұрыс шешім қабылдауына мүмкіндік береді. Осындай жүйелі дайындықтың нәтижесінде сарбаздар өз әскери мамандықтарын толық меңгеріп, бөлімнің жауынгерлік әзірлігін нығайтуға өз үлестерін қосуда.
Абай өңірлік гарнизонының баспасөз қызметі
