Апта сейсенбісінде Абай облысы мәслихатының кезектен тыс, екінші сессиясы өтті.
Сессияға Абай облысы әкімінің бірінші орынбасары Айдын Кәрімов, облыс әкімі аппаратының басшысы Жасұлан Сәрсебаев, аудан әкімдері және мәслихат депутаттары қатысты. Депутаттар Абай облысы әкімдігінің басқару кестесін бекіту; облыс әкімдігінің персоналды құрылымына келісім беру; облыстық сайлау комиссиясының мүшелерін сайлау туралы және өзге де әр түрлі мәселелерді қарады.
Облыс әкімі аппаратының басшысы Жасұлан Сәрсебаев қатысушылардың назарына Абай облысының басқару схемасын ұсынды. Қатысушылар Абай облысы әкімінің аппаратын және қалалар мен аудандар әкімдерінің аппараттарын құру туралы шешімді бір ауыздан қолдап дауыс берді.
Облыста 17 басқарма жұмыс істейтін болады: Қаржы басқармасы, Экономика және бюджеттік жоспарлау басқармасы, Кәсіпкерлік және индустриалды-инновациялық даму басқармасы, Білім басқармасы, Мәдениет, тілдерді дамыту және архив ісі басқармасы, Дене шынықтыру және спорт басқармасы, Жолаушылар көлігі және автомобиль жолдары басқармасы, Жұмыспен қамту және әлеуметтік бағдарламаларды үйлестіру басқармасы,. Энергетика және тұрғын үй-коммуналдық шаруашылық басқармасы, Ауылшаруашылығы және жер қатынастары басқармасы, Денсаулық сақтау басқармасы, Қоғамдық даму басқармасы, Құрылыс, сәулет және қала құрылысы басқармасы, Бақылау басқармасы (МСҚБ, еңбек инспекциясы), Табиғи ресурстар және табиғат пайдалануды реттеу басқармасы, Мемлекеттік сатып алу басқармасы, Ветеринария басқармасы.
Сессияда сонымен қатар аудан әкімдерінің өңірлерде атқарылып жатқан жұмыстары туралы, Семей қаласы әкімінің орынбасары Дархан Жөргекбаевтың әлеуметтік маңыздағы азық-түлік бағасын тұрақтандыру бағытында жүргізіліп шаралар туралы бяндамалары тыңдалды.
Талшын ҚАЛИАСҚАР,
«Семей таңы»
