Мемлекет басшысы Қасым-Жомарт Тоқаевтың төрағалығымен өткен Үкіметтің кеңейтілген отырысында еліміздің болашағын айқындайтын, бүгінгі таңдағы өзекті мәселелерді шешуге бағытталған маңызды іс-шаралар нақтыланды деп санаймын.
Расында, Президентіміз айтып өткендей, қазіргі таңда еліміздің экономикасы сын-қатерлерге төтеп беріп жатыр деуге болады. Бүгінде халықаралық институттар әлемдік экономика қарқыны бәсеңдейді деген болжам айтуда. Соған сәйкес, инфляция жаппай өсуі мүмкін. Дағдарыстың ұзаққа созылып бара жатқанын байқап отырмыз. Сол себептен де Мемлекет басшысының инфляцияны тұрақтандыруға байланысты берген тапсырмаларын уақыт оздырмай орындау өте маңызды.
Қасым-Жомарт Кемелұлының өңірлерден тұрақты жұмыс орындарын ашу, көші-қон саясатын ұтымды жүргізу сынды тапсырмалары да күн талабынан туындап отыр. Бұл ретте барлық деңгейдегі әкімдерге жүктелген осы тапсырманы тікелей өз қадағалауына алып, бірқатар министрлер қызметіне салмақ салуы да көп жайтты аңғартады.
Кеңейтілген отырыста Президент отандық өндірістің әлеуеті толық қолданылмайтынын да айтты. Біз оған бүгінде анық көз жеткізіп отырмыз.
«Қазақстанда жол құрылысына қажетті материалдың бәрі бар. Бірақ отандық өндірістің әлеуеті толық қолданылмайды. Мұны тіпті қолдан жасалған тапшылық деуге болады. Мысалы, елімізде битум өндіретін үш зауыт бар. Соған қарамастан, 200 мың тонна битум жетіспейді. Құрылыс қарқынды жүрген кезде оның бағасы үш есе, яғни бір тоннасы 90 мыңнан 250 мың теңгеге дейін қымбаттайды. Үкіметке жол құрылысына қажетті ресурстарды өндіру және тұтыну барысын мұқият саралауды тапсырамын. Соның негізінде құрылыс материалдарын шығаратын жаңа кәсіпорындар ашу қажет. Ал, жұмыс істеп тұрған нысандарды жаңғырту керек», деді Қасым-Жомарт Тоқаев өз сөзінде.
Президенттің бұл сөздері әсіресе жол сапасы сын көтермейтін еліміздің шығысы үшін де маңызды екені анық.
Қорыта келе айтарым, қазіргідей күрделі ахуал кезінде Мемлекет басшысының тапсырмалары тегеурінді іске түрткі болуы тиіс.
Эльмира СӘМЕКБАЕВА,
Шәкәрім атындағы университеттің оқытушысы,
филология ғылымдарының кандидаты
