Үкіметтің кеңейтілген отырысында ел Президенті Қасым-Жомарт Тоқаев елдегі әлеуметтік-экономикалық жағдайға талдау жасап, Үкіметке бірқатар тапсырмалар берді. Мемлекет басшысы өз баяндамасында біраз жайтқа тоқталды. Олар: инфляцияны тұрақтандыру; азаматтардың табысын арттыру және адам капиталын дамыту; ақша — несие, салық-бюджет саясаты; экономиканың нақты секторын қолдау; энергетикалық қауіпсіздікті қамтамасыз ету; автожол инфрақұрылымын дамыту. Онда әкімдердің жыл сайын әрбір 10 мың тұрғынға 100 жаңа жұмыс орнын ашуы; жастарды жұмыспен қамту; балалардың зорлық-зомбылығын жою; жекеменшік балабақша мәселесі; қосымша білім беруді дамыту; денсаулық сақтау бойынша МӘМС-тің тиімсіздігі және цифрландырудың нашарлығы; коронавирустың қайтадан өршуі мәселелері талқыланды.
Үкіметтің жұмысын сынға алған Президент оның ескі тәсілмен жұмыс істейтінін, жаңаша көзқарастың жоқтығын айта келе, кемшіліктер жіберген үш министрге сөгіс берді. Күзге қарай кадрлық ауыс-түйіс болуы мүмкін екенін айтты.
Біздің айтпағымыз — халыққа салмақ салып тұрған жағдай — азық-түлік бағасының 80 пайызға көтерілуі. Үкімет ең бірінші кезекте осы мәселені шұғыл түрде шешуі керек. Екінші мәселе — ауыл шаруашылығын дамытуға көп көңіл бөліну керек, мал өнімдерінің — еттің дұрыс бағаға өтуін ұйымдастыру, жүн-терінің өңделіп, өтуін қамтамасыз ету қажет. Келесі — жол мәселесі. Шығыс халқы Қалбатау — Боғас арасындағы жолды бір жылдың ішінде жөндеп, қалпына келтірсе деген ұсыныстар айтады.
Тоқсан ауыз сөздің тобықтай түйіні — Президент Үкіметке халықтың көкейінде жүрген мәселелерді шешуге тапсырма берді, Үкімет орындауға міндетті.
Ержан ҚҰТТЫБАЕВ,
ҚР білім беру ісінің үздігі,
Ақсуат ауданы
