Бүгінгі таңда Шығыс Қазақстан облысы бойынша мемлекеттік «Серпін» және «Дипломмен — ауылға» бағдарламалары нәтижелі жүзеге асырылуда. Нақтырақ айта кетер болсақ, соңғы төрт жылда облыс орталығы Өскемен қаласындағы Сәрсен Аманжолов атындағы ШҚУ-дың 1259 түлегі ауылдық жерлерге тұрақты жұмысқа орналасыпты.
Аталған жоғары оқу орнының баспасөз қызметінің мәліметтеріне сүйенер болсақ, бүгінгі таңда оқу орны түлектерінің 98 пайызы жұмысқа орналасады екен.
Сөз орайында айта кетерлігі, Сәрсен Аманжолов атындағы университет түлектердің өз кәсібін тауып, болашақта алған мамандықтары бойынша еңбек етулері үшін бар мүмкіндікті жасауда. Осы ретте оңтүстік және батыс өңірлерден келген студенттер техникалық білім беру бағдарламаларын меңгеріп, еңбек жолдарын ШҚО-ның «Қазцинк», «ТМК» және тағы басқа ірі зауыттарынан бастауда. Ал педагогикалық бағытта білім алған түлектер шығыс өңіріндегі үздік педагогтер қатарынан көрініп жүр.
Университет ректоры, Өскемен қалалық мәслихатының «AMANAT» партиясы фракциясының депутаты Мұхтар Төлегеннің айтуынша, депутаттар жастарға бағдарламаның мақсатын, міндеттері мен артықшылықтарын белсенді түрде түсіндіріп келеді. Осылайша, ауылдық аумақтардың кадрлық әлеуетін нығайту мақсатында университет түлектері ауылдық жерлерге жіберіліп, оларға көтерме жәрдемақы және тұрғын үй сатып алу немесе салу үшін бюджеттік несие түріндегі қолдау көрсетілуде.
Сонымен қатар түлектер қазіргі уақытта өңірдің Казцинк, Казминералс, ҮМЗ сияқты жетекші өнеркәсіптік кәсіпорындарда, сондай-ақ агроөнеркәсіптік секторда, мемлекеттік және квазимемлекеттік мекемелерде жұмыс істеуде.
Соңғы төрт жылда Сәрсен Аманжолов атындағы ШҚУ бакалавриат, магистратура және докторантура бойынша барлығы 8 924 түлек дайындап шығарыпты.
Азамат ЕРСАЙЫН,
«Семей таңы»
