Шаһарымызда Қазақстан студенттер Альянсы облыстық штабының ұйымдастыруымен “Семей аруы — 2022” сұлулық сайысы өтті. Биыл оныншы рет өткізіліп отырған сайыста қаламыздың ең сұлу, ең талантты 7 аруы бақ сынады. Шәкәрім университеті, Alikhan Bokeikhan University, Семей медициналық университтеті мен Қалматаев атындағы жоғары медициналық колледжі және Авиценна жоғары медициналық колледжінен іріктелініп алынған көріктілеріміз — өз білім ордаларында өткен сұлулық байқауының жеңімпаздары.
— Осы байқауды өткізіп келе жатқанымызға 10 жыл болды. Жыл сайын ұйымдастырылатын “Семей аруы” сұлулық байқауына биыл қаламыздағы барлық оқу орындарынан ақылына көркі сай аруларымызды іріктеп алдық. Байқауды өткізудегі мақсатымыз жастарды қоғамдық және мәдени өмірге тарту, эстетикалық талғамды қалыптастыру және адамгершілікке, ұлттық құндылықтарды құрметтеуге тәрбиелеу, сонымен қатар жас ұрпақтың шығармашылық әлеуетін дамыту, өнерлі, белсенді аруларды көпшілікке үлгі ету,- дейді Қазақстан студенттер Альянсының Шығыс Қазақстан облыстық штабының төрағасы Мират Алмасұлы.
Қатысушылар байқауға үш аптадан аса уақыт дайындалыпты. Қыздарды осы шараға дайындауды өз жауапкершілігіне алып, оларға сахнада өзін-өзі ұстау, сөйлеу мәдениетін үйреткен «Іңкәр сезім» модельдік агенттігінің қоюшы-хореографы Томирис Жолдоспаева екенін айта кеткен орынды болар.
Байқау ережесі бойынша, арулар сахнада шығармашылық, интеллектуалдық қабілеттерін көрсетті, сондай-ақ кешкі көйлек үлгісін таныстырды.
Сұлулық сайысына Қазақстан студенттер Альянсының облыстық штабы төрағасы Мират Алмасұлы, “Іңкәр сезім” модельдік агенттігінің қоюшы-хореографы Томирис Жолдоспаева, “Дулатов дресс Семей” брендінің негізін қалаушы Айжан Дулатова және “Семей руы — 2019” байқауының жеңімпазы Бұлбұл Мажитова қазылық етті.
Қазылар алқасына жеңімпазды анықтау қиынға соққаны белгілі, себебі қыздардың бәрі сұлу, бірінен бірі өтеді. Дегенмен өзінің ақылымен, көркімен ерекшеленген Alikhan Bokeikhan University студенті Әлия Абдығалиева қаламыздың ең сұлу бойжеткені атанды.
— Байқауға 2 апта бойы қызу дайындық үстінде болдым. Күнделікті дайындалдық, оңай болмады. Біраз қобалжыдым, уайымдадым, бірақ бәрі жақсы болды, — дейді “Семей аруы — 2022” байқауының тәжін жеңіп алған Әлия Абдығалиева.
Айта кетейік, сұлулық байқауына қаламыздың жеке кәсіпкерлері демеушілік көрсетті. Солардың бірі — “Dulatova dress Semey” сәнді көйлектер үйі.
Камилла НАРТ,
Шәкәрім университеті студенті
