Ақсуат ауданында Ырғызбай Досқанаұлы атындағы халықаралық өнер және спорт фестивалі өткізілмек.
Халық емшісі Ырғызбай Досқанаұлы атындағы дәстүрге айналған халықаралық өнер және спорт фестивалі 29 шілде күні басталады.
Халықаралық фестиваль барысында жергілікті кәсіпкерлердің қолдауымен Ырғызбай Досқанаұлына ас беріледі. Айтулы шараға қазақ күресінен халықаралық Гран-при өткізіледі, Қазақстан, Ресей, Грузия, Польша, Украина, Чехия, Дания, Түркия, Иран, Латвия, Қытай, Моңғолия, Қырғызстан, Өзбекстан, Әзербайжан, Армения, Литва, Эстония, Тәжікстан және Түрікменстан мемлекеттерінен балуандар шақыртылған. Жеңімпаздарға аса қомақты жүлделер тігілген.
Сондай-ақ балалар арасында Құран кәрімді жатқа оқудан республикалық деңгейдегі жарыс өткізілмек. Сонымен қатар фестиваль аясында ұлтымыздың қаһарман тұлғасы Қаракерей Қабанбай батырдың 330 жылдық мерейтойына арналған «Отан қорғау жолындағы батыр ерліктері» тақырыбындағы республикалық ғылыми-тәжірибелік конференция ұйымдастырылмақ. Оған еліміздің әр түкпірінен, жоғары оқу орындарынан зерттеуші-ғалымдар шақырылады.
Көкпекті ауданы Екпін ауылында 140 шақырымдық бәйге, Ақсуат ауылының орталық стадионында ASSYL DOMBYRA — 2022 суперфиналы және эстрада жұлдыздарының қатысуымен концерт өтеді.
«Тұғыры биік Тарбағатай» атты өнер және спорт фестивалі 31 шілдеде мәресіне жетпек.
Динара НҰРЛЫБЕКҚЫЗЫ,
«Семей таңы»
