Дәрігер — адам өмірі үшін жауапкершілік алып, оның денсаулығына алаң болып жүретін бірден-бір мамандық иесі. Өз ісін сүйіп, халқына адал қызмет етіп жүрген ақ халатты жандарды қанша дәріптесек те артық етпейді.
Адам жанына араша түсіп жүрген абзал жандардың бірі — Күршім аудандық ауруханасының терапевт дәрігері Айнагүл Тукушева. Айнагүл Қайрокенқызы 1971 жылы Күршім ауданына қарасты Төртқалмақ ауылында дүниеге келген. Қазіргі таңда өзінің туған жерінде денсаулық сақтау саласында еңбек абыроймен етуде.
Бала кезінен дәрігер болуды армандаған Айнагүл Қайрокенқызы 1988 жылы мектеп бітіріп, келесі жылы Семей медицина университетіне оқуға түседі. Жоғарғы оқу орнын тамамдаған жас маман қалада қалмай, туған жеріне келіп, Сарыөлең ауылындағы амбулаторияда еңбек жолын бастайды. Осы ауылда өзінің жан жарын кезіктіреді.
Бүгінде сүйікті жұмысы мен отбасылық өмірді қатар алып жүрген ақ халатты жан жұбайы Дәулет Ибраевпен тату-тәтті ғұмыр кешуде. Аяулы қыздары Анар анасының жолын қуып, медицина саласын таңдапты. Ол — болашақ кардиолог маман.
Айнагүл Қайрокенқызы 2011 жылы Күршім аудандық ауруханасына ауысады. Қазіргі таңда тәжірибелі, білікті маман күні-түні жарғақ құлағы жастыққа тимей, науқастарды аяғынан тұрғызуға бар білімін, күш-жігерін салып жүр. Әріптестері арасында сыйлы, жас мамандарға ақыл-кеңесін айтып, мамандықтың қыр-сырын үйретуден жалықпайтын үлкен жүректі дәрігер науқастарды жылы сөзімен де емдейді. Еңбекқор, білікті дәрігер — бүгінде аудандық аурухананың соматика бөлімінің меңгерушісі.
Ел алғысын арқалап жүрген дәрігердің еңбегі лайықты бағаланып та жүр. Айнагүл Қайрокенқызы Күршім ауданы әкімінің, аурухана басшылығының алғыс хаттарымен марапатталған. Жаһанды жайлаған пандемия кезіндегі қажырлы еңбегі үшін де марапаттауларға ие болды.
— Қазіргі эпидемиологиялық жағдайға байланысты халықты сақтануға шақырамын. Көпшілік орындарға баруды тоқтатып, дұрыс тамақтану керек. Балаларыңызды, жақындарыңызды ойлаңыздыр, маска тағып, денсаулықтарыңызға абай болыңыздар, -дейді Айнагүл Тукушева.
«Бүгінде бүкіл еліміз медицина қызметкерлерінің қайсарлығына тəнті болуда. Олар – адам өміріне араша түсіп жатқан бүгінгі күннің батырлары»,- деп Президентіміз айтқандай, қайтсек науқасты ажалдан арашалап қаламыз деп жанын сала еңбек етіп жүрген ақ желеңді жандардың еңбегі құрметке лайық. Мемлекет басшысы Қасым-Жомарт Тоқаев дəрігерлер мен медицина қызметкерлеріне қуатты қолдау көрсетіп, зор сенім білдіріп отыр.
Талшын ҚАЛИАСҚАР,
«Семей таңы»