Семей қаласындағы Әлихан Бөкейхан университетінде «Абай облысында кәсіпкерлікті дамыту» атты тақырыпта конференция болып өтті. Жиынға Абай облысы әкімінің бірінші орынбасары Айдын Кәрімов, «Самұрық-Қазына Контракт» ЖШС Бас директорының орынбасары Дархан Рамазанов, «Атамекен» ҰКП Басқарма төрағасының орынбасары Тимур Жаркенов қатысты.
Бұл басқосу аймақтағы шағын және орта кәсіпкерлік сала өкілдері үшін маңызы зор оқиғалардың бірі екендігі анық. Басты мақсат — «Самұрық-Қазына» АҚ тарапынан қазақстандық өнім өндірушілерді қолдау шаралары, осынау бағыттағы атқарылып жатқан жұмыстар барысы туралы ақпараттандыру. Сол себептен де, конференция кәсіпкерлікті жаңадан бастаған және іскерлік мақсатта жаңадан жоспар құрып жүрген азаматтар үшін өте маңызды болды.
Конференция аясында Абай облысының әкімдігі, «Самұрық-Қазына Контракт» ЖШС, «Атамекен» ҰКП арасында үшжақты меморандумға қол қойылды. Осылайша кәсіпкерлік саланы қолдау, жандандыру және импорт алмасу саясатын іске асыру бойынша ынтымақтастық аясында бірлесіп жұмыс жүргізуге уағуға арналады.
— Кездесудің тағы бір мақсаты – «Самұрық-Қазына» қорының сатып алу жұмыстарының жаңа тәртіптерін түсіндіру. Бұл шара «Атамекен» Ұлттық кәсіпкерлер палатасының «Самұрық-Қазынамен» бірлесіп ұйымдастыруымен өтуде. Конференцияда осыған дейін іске асырылған барлық жаңашылдықтарға және Мемлекет басшысының Жолдауында айтылған тапсырмалар шеңберінде орындалуы тиісті мәселелерге назар аударылды. Президент Жолдауында ел кәсіпкерлерін қолдауға көп көңіл бөлінді, сондықтан да, бұл ретте «Самұрық-Қазына Контракт» қорының қатысуымен жұмыс жүргізудің маңызы зор. Сонымен қатар, Ұлттық Кәсіпкерлер Палатасы бизнес қауымдастықпен бірлесіп, қор жұмысының жаңа тәртібіне енгізілуі қажет ұсыныстарды да дайындауы керек, — деді өз сөзінде пікір білдірген «Атамекен» Ұлттық кәсіпкерлер палатасы басқарма төрағасының орынбасары Тимур Жаркенов.
«Самұрық-Қазына Контракт» ЖШС Бас директорының орынбасары Дархан Рамазановтың айтуынша, отандық тауар өндірушілерді қолдау және жергілікті қамтуды дамыту «Самұрық-Қазына» Қорының стратегиялық міндеттерінің бірі болып табылады.
-Бұл бағдарлама жаңа жұмыс орындарын ашуға, өндірілетін өнім түрлерін кеңейтуге және жергілікті қамтуды ұлғайтуға ықпал етеді. Осы жұмыстың барысында 2018-2022 жылдары 240 оффтейк-келісімшарт жасалды. Оның көлемі — 82 млрд теңгеден астам. Бүгінде таза импорт тауарлары бойынша қажеттілік алдымыздағы бес жылға шамамен 110 млрд теңгені құрайды. Және 4,5 мың позицияны қамтиды, — деді Дархан Рамазанов.
Бұл ретте аталмыш бағдарлама аясында оффтейк-келісімшарт тиімді шарттармен қаржыландыруды тартудың басты құралы болып табылатынын айта кеткен жөн. «Самұрық-Қазына» қоры реттелетін сатып алуларда алғашқы болып мұндай келісімшарттарды енгізді.
Бұдан басқа, кездесу барысында бірқатар маңызды тақырыптарды өзек еткен семинар алаңдары ұйымдастырылды. Олардың қорытындылары бойынша шағын және орта кәсіпкерлікті қолдау саласындағы өңірлік саясатты қалыптастыру үшін арнайы қарар әзірленді.
Сонымен қатар конференцияда оқыту семинарлары өтіп, оның барысында «Самұрық-Қазына Контракт» ЖШС сарапшылары отандық өндірушілерді қолдау ісімен таныстырды. Яғни, алдын ала біліктілікті іріктеу және Қордың сатып алуларына қатысу жолдары туралы да кеңінен айтылды.
Дана ТАЛҒАТБЕКОВА,
«Семей таңы».
