Агроөнеркәсіптік кешен Шығыс Қазақстан облысы экономикасының ажырамас бөлігі болып табылады. Облыс республикада сүт, күнбағыс, бал және пантылар өндірісі бойынша жетекші орында. Сондай-ақ ет өндірісі бойынша екінші орын және картоп өсіруде үшінші орында. Тәуелсіздік жылдары ішінде аймақтың агроөнеркәсібі жақсы нәтижелер көрсетіп келеді.
Аймақта Мемлекет басшысының агроөнеркәсіптік секторды дамыту бойынша алға қойған міндеттерін жүзеге асыру үшін өсімдік шаруашылығын дамыту бағдарламасы іске асырылып жатыр, тиімділігі жоғары дақылдар алқаптарын ұлғайтып, егістіктерді әртараптандыру ісі қолға алынған.
Елімізде өсірілетін күнбағыс көлемінің 66 пайызы осы облысқа тиесілі және оны қайта өңдеу көлемін арттыру басты міндет болып отыр.
ШҚО әкімі Даниал Ахметовтің айтуынша, жоғары сапалы дайын өнім нарығына шығу үшін биылғы жылдың басынан бері облыста қуаты 300 мың тонна ірі май-экстракциялық зауыт пайдалануға берілді. Өскемен қаласында қуаты 50 мың тонна күнбағыс майы зауыты салынып жатыр. Жұмыс істеп тұрған өндірістерді ескере отырып, жаңа май-экстракциялық зауыттардың іске қосылуы қайта өңдеудің жалпы көлемін 1 млн тоннаға дейін, сондай-ақ өсімдік майларының экспортын 1,3 есе ұлғайтуға мүмкіндік береді.
Тәуелсіздік жылдарында облыста сүт өңдеу, май-тоң май, ұн-құрама жем және басқа да салалар бойынша 19 ірі кәсіпорын пайдалануға берілді.
Бүгінде Өскемен қаласында ауыл шаруашылығы өнімдерін делдалсыз, алыпсатарсыз сатып алуға және қоймаларда сақтауға болатын көтерме-тарату орталығының құрылысын бастауға дайындық жүріп жатыр. Мұнда қоймалар, кросс-доктар, сауда павильондары, ауыр жүк көліктерінің жүргізушілеріне арналған қонақ үй салынады. Сонымен қатар бұл жерде барлық қажет құжаттарды рәсімдеуге, сараптама жүргізуге және сатылатын өнімдерге сапа сертификатын алуға болады. Осындай орталықтар арқылы ауылшаруашылық өнімдерінің бағасын негізсіз көтеретіндерге тосқауыл қойылмақ.
Жадыра ТӨЛЕГЕНҚЫЗЫ,
«Семей таңы»
