Бүгінгі таңда шығыс өңірінде астық жинау қарқыны жоғары. Күзгі мизам-шуақ диқандардың жұмысына оң әсерін тигізді.
Әйтсе де биылғы жаздағы, тамыз-қыркүйек айларындағы құрғақшылық, жауын-шашынның болмауы, көңілді күпті еткені жасырын емес. Оның үстіне ел көлемінде өрт қаупі өршіп тұрды. Алайда дақылдардың пісіп жетілуіне, астықты уақтылы жинауға және өңдеуге қолайлы жағдайлар да жоқ емес.
Облыстық ауыл шаруашылығы басқармасының ақпаратына сүйенсек, биыл Шығыс Қазақстанда егіс алқаптарына 640 мың гектарға жуық жер бөлінген. Бұл өткен аграрлық маусымға қарағанда шамамен 24 мың гектарға артық. Сондай-ақ өңірдегі шаруашылықтарда 2074 комбайн бар. Оның 355-і өнімділігі жоғары заманауи машиналар. Әрбір комбайнға орташа маусымдық жүктеме 350 гектардан аспайды.
Қазір көптеген фермалар мен шаруа қожалықтары трактор паркін жаңартты. Өйткені күзгі жаңбыр күшейгенде бұл техниканың пайдасы көл-көсір. Жалпы, өнімділігі жоғары әрі жаңа жабдықтар астықты сапалы, жылдам бастыруға септігін тигізеді, оған қоса шығындарды барынша қысқартуға мүмкіндік береді.
Мәселен, жақында Катонқарағай ауданының Большенарым ауылындағы «Жас Қанат» шаруа қожалығы шетелден комбайн алды. Тәжірибелі әрі беделді аграршы Анатолий Матасов бастаған ұжым қол еңбегін алмастыратын жаңа технологияларды шаруашылыққа енгізіп, заманауи техникаларды сатып алған сайын табыстары арта түсуде.
Жалпы, соңғы уақытта ауыл шаруашылығына қатысты осындай жағымды жаңалықтарды баспасөз беттерінен жиі ұшырастыруға болады. Мәслихат сессиясындағы есебінде облыс әкімі де аграрлық салаға көп тоқталды.
Шығатын түйін біреу — құрғақшылықтың «құрығына» ілікпеу. Облыс басшысы әсіресе Зайсан ауданының оңтүстігіндегі ауылдарда суару жобаларын іске асыру қажеттігін атап өтті. Облыс басшылығының пікірінше, бұл үшін тиісті қаражат бөлінуі тиіс. Оңтүстік аймақтардың географиясы мен қашықтығын, логистикалық шығындарды, климаттың ерекшеліктерін және басқа да көптеген маңызды факторларды ескеру қажет.
Ал зайсандық мамандарының айтуынша, дәл бұл орайда ауданның ірі әлеуеті бар.
Зарина КӘП,
«Семей таңы»