Сәрсенбі, 16 қараша күні Абай облысының аумақтық сайлау комиссиясы БАҚ өкілдеріне арналған брифинг өткізді. Брифингте сайлау учаскелерінің дайындығы, сайлау кезіндегі бақылаушылардың құқықтары мен міндеттері туралы айтылды.
Дана ТАЛҒАТБЕК,
«Семей таңы»
Абай облысының АСК төрайымы Н.Фесенконың айтуынша, Абай облысы бойынша 475 сайлау учаскесі жұмыс істейді, оның ішінде 36 учаске жабық. Облыс аумағында 486 комиссия бар, оның 1-і облыстық, 10-ы қалалар мен аудандардың комиссиялары. 3290 комиссия мүшесі бар. Учаскелік сайлау комиссиялары мүшелерінің 40 пайызын педагогтер, 10 пайызын коммерциялық құрылым, 5 пайызын медицина және басқа да сала қызметкерлері құрайды. Сайлаушылар саны 1500 адамнан асатын 125 учаскеде азаматтарды тіркеуді тексеру бойынша қызмет, 5 учаскеде халыққа мобильдік қызмет көрсету орталығы жұмысы ұйымдастырылады.
— 30 қазанда жеке тұлғаларды есепке алудың мемлекеттік базасымен пысықталған сайлаушылар тізімі барлық сайлау учаскелеріне берілді. Осыдан кейін учаскелік комиссиялар қала тұрғындарына шақырулар дайындап, тарата бастады. Әрбір азамат өзінің сайлау учаскесінің мекенжайын білуге, дауыс беруге құқылы. Барлық сайлау учаскелері шақыру, есептен шығару куәліктері, әдістемелік материалдар, тағы да басқа барлық қажетті баспа өнімдерімен қамтамасыз етілген. Істен шыққан жәшіктер ауыстырылды, — деді Наталия Анатольевна.
Сайлаушы ЖСН немесе өзі тіркелген мекенжайын көрсету арқылы сайлау учаскесі туралы онлайн режимінде, сондай-ақ облыс әкімінің ресми сайтынан біле алады. Сондай-ақ 109 қысқа нөмірі бойынша Бірыңғай байланыс орталығына хабарласуға болады. Ал дауыс беру күні тіркелген жері бойынша дауыс бере алмайтын, өзінің тұрғылықты жерін ауыстырған азаматтар есептен шығару талонын алып, басқа сайлау учаскесінде дауыс бере алады. Талон 19 қараша күнгі 18.00-ге дейін беріледі. Егер сайлаушы өзін нашар сезінсе немесе басқа да жағдаймен өз учаскесіне келе алмайтын болса, дауыс беру күні сағат 12-ге дейін үйде дауыс беруге құқылы. Бұл жағдайда сайлау комиссиясының кемінде екі мүшесі тасымалданатын жәшіктермен барады.
Сондай-ақ учаскелік сайлау комиссиялары мүшелерін каскадты электоралдық оқыту жалғасуда, бұған дейін сайлау комиссияларының 2,5 мың мүшесі 8 сағаттық оқытудан өткен. Онлайн және офлайн режимде заңгерлер, журналистер оқытудан өткен.
— Әр түрлі ұйымдардың, саяси партиялардың бақылаушылары мен азаматтардың өздері де сайлауға бақылаушы ретінде қатыса алатынын атап өткім келеді. «Сайлау туралы» Заңда бақылаушылардың міндеттері мен құқықтары нақты жазылған. Қазіргі уақытта қаламызда халықаралық ұйымдардың бақылаушылары алдағы сайлаудың дайындығы мен өткізу барысын бақылауды жүзеге асыруда, — деді аумақтық сайлау комиссиясы төрайымының орынбасары Әсет Баймұратұлы.
Барлық сайлау учаскелерінде мүгедектігі бар адамдар үшін барлық жағдай жасалған. 434 учаскеде пандустар, 384 учаске кіреберісінде, 371 учаске ішінде тактильді көрсеткіштер бар. Сурдоаудармашылар да жұмыс істейді, Брайль кестесі бар трафареттер және нашар көретіндерге арналған үлкейткіш лупалар ұсынылады. Дауыс беру күні 16 инватакси (Семей қаласында 12, Аягөз ауданында 3, Жарма ауданында 1) қызмет көрсетеді. Қалған өңірлерде, қажет болған жағдайда, мүгедектігі бар адамдар дауыс беру кезінде тасымалдаумен қамтамасыз етіледі.
