Кеше, 1 желтоқсан күні Alikhan Bokeikhan университетінде республикалық «Табысты отбасы» әлеуметтік жобасын таныстыру мақсатында баспасөз конференциясы өтті. Конференцияға Абай облысы әкімінің бірінші орынбасары Айдын Кәрімов, жоба жетекшісі Айжани Нұрланова және қаладағы қоғамдық ұйымдардың өкілдері қатысты.
Жадыра ТӨЛЕГЕНҚЫЗЫ,
«Семей таңы»
«Самұрық-Қазына» АҚ қолдауымен 1 желтоқсаннан бастап Жетісу, Абай, Ұлытау, Түркістан және Ақтөбе облыстарында бастауын алған «Табысты отбасы» жобасы әлеуметтік жағдайы төмен отбасыларды қолдауға арналған. Бұл мақсатта «Samruk-Kazyna Trust» қоры 200 млн. теңге бөліп отыр. Жалпы, аталған бес облыста барлығы 300 грант, Абай облысы бойынша 70 грант қарастырылған. Бір адамға 150 АЕК, яғни 450 мың теңге көлемінде қаржы бөлінеді. Жобаның шарты бойынша, грант қаржылай емес, жаңа құрал-жабдық түрінде беріледі.
— Жобаның мақсаты – шын мәнінде күнкөрісі төмен жанұяларды, жалғыз басты аналар мен әкелерді, табысы төмен отбасылардан шыққан 29 жасқа дейінгі жастарды өз ісін өркендету үшін жаңа дағдыларға оқыту және тәлімгерлік қолдау,- дейді жобаның бренд-амбассадоры Айжани Нұрланова.
Айта кету керек, мемлекеттен атаулы әлеуметтік көмек алатын отбасылар, сондай-ақ қайтарымсыз мемлекеттік грант иегерлері аталған жобаға қатыса алмайды. Жобаға қатысушылар тамақ өнеркәсібі, сұлулық саласы, СММ, тігін өнеркәсібі және ерлерге арналған техникалық мамандықтар бойынша курстан өте алады. Сонымен қатар сұраныс бойынша өзге де салалар қарастырылуы мүмкін.
— Бейіндік оқыту бойынша курстың ұзақтығы екі аптаға созылады. Одан әрі тұлғалық даму, бизнес-дағдыларды қалыптастыру бойынша шеберлік сағаттары, психолгиялық тренингтер өткізіледі. Тәлімгерлерден жеке кеңестер беріледі. Бұл жоба азаматтар үшін өз ісін бастауға, кәсіпкерліктің негіздерін сапалы меңгеруге және тұрақты табысы көзін табуға арналған бірегей мүмкіндік. Оқыту онлайн емес, оффлайн форматта жүзеге асады. Себебі онлайн алған білімнің сапасы қандай болатынын білеміз, — дейді Айжани Нұрланова.
Бұл орайда Абай облысы әкімінің бірінші орынбасары Айдын Кәрімов игі бастаманы Абай облысы әкімдігі қолдайтынын білдірді.
— Жаңадан құрылған Абай облысына осындай әлеуметтік жобалар қажет. «Самұрық –Қазына» ұлттық әл-ауқат қоры қаржыландырып отырған «табысты отбасы» жобасы әр өңірдің ерекшелігіне баса назар аударатыны қуантады. Көпбалалы және аз қамтылған отбасылар қолдауды қажет ететін біздің қоғамның маңызды тобы. Олардың қаржылық жағдайын нығайту үлкен әлеуметтік мәнге ие. Біз әлеуметтік осал отбасылдарды жаңа дағдыларды игеруге және өз ісін ашуға ынталандыратын барлық осындай бастаманы қолдаймыз,- деп атап өтті Айдын Кәрімов.
«Ақ ұлпа аналары» қоғамдық бірлестігінің басшысы Анар Сүлейменова АӘК алатын отбасыларды да жобаға қосу, салаларды кеңейту туралы ұсыныс айтты.
— Мәселен, біздің қалада кондитерлік өнім шығаруда бәсекелестік өте жоғары. Сондықтан аталған бес бағыттан бөлек, басқа да салаларды қамтуды қарастырған дұрыс секілді, — деді Анар Сүлейменова.
— Мен біраз уақыт ҚР Еңбек және халықты әлеуметтік қорғау министрінің кеңесшісі болып қызмет атқардым. Еліміздегі барлық облыстарды аралап, ауылдық елді мекендерде көп болдым. Сонда байқағаным, АӘК алатын адамдар грант алуға аса құштар емес. Олар көбіне табысы асып кетіп, АӘК-дан айырылып қалмауды ойлайды. Біздің жобаның басты мақсаты – шын мәнінде көмекке мұқтаж отбасыларға жәрдемдесу. Мемлекеттен қайтарымсыз грант алып, оны іске асыра алмай кәсібін жапқан азаматтарға да көмектесе алмаймыз. Екінші сұраққа келсек, қатысушылардың өтініші мен сұранысы бойынша қосымша салалар қосылуы мүмкін. Бірақ негізінен осы бағыттар бойынша жұмыс атқарамыз. — деді Айжани Нұрланова.
Жобаға қатысу үшін жергілікті әкімдіктерге барып өтініш беруге болады.
— Негізінен жергілікті әкімдіктер мен қоғамдық ұйымдар ұсынған тізім бойынша жұмыс сітейміз. Соынмен қатар мешіттерге де барамыз. Себебі онда шынымен мұқтаж жандар телефон нөмірлерін қалдырып кетіп жатады,- дейді Айжани Нұрланова.
